FCCA lo transforma un cas bandona den un scol di musica di bario

ORANJESTAD – Fundacion Cas pa Comunidad Arubano FCCA lo transforma un cas bandona den un scol di musica di bario. Asina Maroushka Rafini di FCCA a informa diahuebs, durante e presentacion di e proyecto di Scol di Musica “E Porta di Harmonia” den Semeleerstraat.  

NO A TRAHA CAS 

Rafini a admiti cu pa algun aña caba, FCCA no a haya e oportunidad pa traha casnan nobo y FCCA ta anhela pa pronto por traha casnan y crea barionan pa trece comunidadnan hunto. E proyecto aki ta un stap grandi den e maneho nobo pa crea infrastuctura pa haci barionan social completo.  

IDEA DI EMAN

E idea pa e proyecto a nace durante un bishita recient di Prome Minister Mike Eman na e bario, ora cu su bista a cay riba e parcela y e necesidad pa mas union den comunidad a bira cla. E momento ey mes a planta e simia pa un idea cu awe ta bira realidad. Segun Eman, e cas den Semeleerstraat tabata ideal pa e iniciativa: un espacio cu por transforma cu e meta pa yuda e bario crece, trece musica, oportunidad y cultura bek den comunidad. FCCA no a duda ni un momento pa forma parti di e proyecto, mustrando asina su compromiso firme pa yuda Aruba crece di manera sostenibel y inclusivo. E plan ta pe keda cla cu e trabaonan di renobacion pa 1 di september proximo, y den e periodo inicial lo involucra esnan interesa pa yuda duna contenido na e lesnan basa riba e instrumentonan cu kier siña toca  Harjan Meijer, habitante di Semeleerstraat y alabes musico, ta sumamente antusiasma pa e proyecto aki y cu su 16 aña di experiencia como musico, ta cla pa duna sosten si mester. E proyecto aki lo sirbi e hobennan di e bario bon y tin como meta pa yuda wanta e hobennan for di caya.