CAFT: No por duna reparatie toeslag na tur pensionado, irespecto nan entrada

ORANJESTAD - “Den e practica actual, gobierno (di Aruba) ta otorga e reparatietoeslag (suplemento di reparacion) na tur pensionado, irespecto di nan entrada”, ta loke e colegio di supervision financiero di Aruba CAFt  ta bisa den e conseho riba e presupuesto pa pais Aruba pa 2026. “Esaki no ta cuadra cu e stipulacionnan di e Ordenanza Nacional Suplemento di Reparacion” e colegio ta sigui bisa. Ademas, CAFt ta sigui bisa cu considerando e desvio aki di e stipulacion legal y e impacto presupuestario di e medida aki, CAft ta haya importante cu lo aplica un comprobacion di ingresonan. “Esaki ta fomenta e eficacia di e medida y ta contribui na e control di e consecuencianan presupuestario”. Den papiamento crioyo, ‘No por duna tur pensionado reparatie toeslag, sino solamente esnan cu realmente mester di dje’. Noticiacla a compronde di gobierno, cu esey ta e intencion si. 

PUNTO POSITIVO Y GOBIERNO TA CUMPLI

Tin puntonan positivo tambe den e conseho di CAFt, unda cu e ta bisa cu pa e sector colectivo, Aruba ta presupuesta un surplus di AWG 159 miyon na 2026, es decir: 2,1 porciento di e producto nacional bruto (bbp). Den e periodo 2027-2030  tambe ta presupuesta un surplus anual di mas cu un porciento di e bbp. Di e manera aki e OB ta cumpli cu e norma presupuestario pa e saldo di financiamento di e sector colectivo conforme e LAft, y cu e compensacion di deficit prescribi.

CAMBIA MANEHO PA SURPLUS KEDA SOSTENIBEL

CAft ta señala cu si no ta cambia maneho, e sostenibilidad di e surplus por bini bao di presion, tambe considerando e gastonan cu ta aumenta den e periodo 2023-2026. Banda di esey, CAft ta mustra riba riesgonan, entre otro e inciertitudnan den e marco di e desaroyo di interes. Den e contexto aki, CAft ta haya importante pa hiba un maneho presupuestario vigilante y prudente, siendo control di gastonan un punto esencial.

AUMENTO DI GASTO

CAFt ta mustra tambe cu desde 2023, e gastonan a aumenta cu aproximadamente AWG 250 miyon. E aumento aki ta principalmente debi na intensificacionnan di maneho, incluyendo e indexacion di e salarionan di ambtenaarnan y personal di enseñanza, y e aumento di e suplemento di  reparacion pa pensionadonan.