Awe ta bira conoci si AVB ta scohe pa un presidente nobo of no

ORANJESTAD - Awe diaranson tin eleccion pa presidente di Aruba Voetbal Bond. E dos candidatonan ta e actual presidente Randolf Laclé, y e actual vice presidente Jomar Boekhoudt. Ambos tin un grupo di persona cu lo forma e directiva, si eligi, of den e caso di Laclé, re-eligi.  Segun e portal di deporte 297 Sports, tur dos grupo a ilustra y presenta nan plan di bon gobernacion pa loke ta e futuro di nos futbol local.  

SITUACION TENSO DEN FUTBOL

E eleccion ta determina si e miembronan ta sostene e maneho di e actual presidente of si nan kier ‘sanger nobo’. Ta conoci cu ultimo tempo no tabatin mucho satisfaccion pa e presidente y su directiva, unda cu te hasta a haci intento di bah’e. “Awe e clubnan di futbol tin cu tuma un desicion importante pa loke ta e maneho y bon gobernacion di nos futbol local. No lo bay ta nada facil ya cu ambos grupo tin candidatonan fuerte y capacita pa traha na bienestar di nos futbol” e portal 297 ta bisa di su relato riba e tema.