Estado Falcón optimista pa posibel reanudacion di ruta di ferry cu Islanan ABC

ORANJESTAD/ FALCÓN – E sector marítimo den e estado Falcón di Venezuela ta optimista tocante e potencial reestablesemento di coneccionnan di ferry cu e islanan Caribense Hulandes di Aruba, Boneiru y Corsou. Asina e portal radial di Venezuela Union Radionet,   ta raporta dialuna. 

IMPORTANCIA ECONOMICO 

Segun e portal, e empresario di barco Juan Díaz a enfatisa e importancia economico di rebiba lasonan maritimo entre Falcón y e asina yama islanan ABC. “Restora servicio di ferry pa e islanan ABC lo tin un impacto grandi,” Díaz a bisa Unión Radio. “Antes nos tabatin e coneccion aki, pero e la bay perdi cu tempo. Reestablese esaki lo ta un paso signifikante pa desaroyo di e península, ya cu e lo impulsa intercambio comercial.”

Segun Díaz, reanudando e servicionan di ferry lo por revitalisa comercio entre e continente Venezolano y e islanan cercano, specialmente pa e region di Paraguana, cu historicamente a beneficia di comercio maritimo cu Curaçao y Aruba.

Compania di barco Korferry a expresa interes pa lansa un ruta for di Falcón, cu un posibel coneccion directo pa Corsou. Aunke plannan concreto no a wordo anuncia, e compania su boluntad pa explora e ruta ta señala un impulso regional creciente pa e restauracion di lasonan marítimo. Un movemento asina por facilita transporte di carga, impulsa turismo, y fomenta lasonan economico entre e islanan ABC y west di Venezuela, particularmente na un momento cu integracion regional ta wordo reconsidera despues di añanan di obstaculonan politico y logistico.