Gerente di adouane: Camara no ta afecta derecho di privacidad di pasahero

ORANJESTAD -Gerencia di Departamento di Aduana diabierna merdia a bisa di ta lamenta e walk-out cu a sosode awe mainta na aeropuerto Reina Beatrix. E accion aki tabata relaciona cu e instalacion di un camara di seguridad den e area di inspeccion/control di Aduana cu ta situa den e sala di yegada.

COMPRENSION

“Nos ta compronde e preocupacionan di nos empleadonan encuanto e instalacion di e camera y ta percura pa nan por eherce nan trabou na e maximo di nan potencial” e comunicado ta sigui bisa.  “ Pa ser exacto, e camara a ser instala bou peticion y aprobacion di Aduana, teniendo na cuenta tur procedemento y maneho di aeropuerto Reina Beatrix. E camara ta hunga un rol crucial den fortalecemento di seguridad y proteccion den e sala di yegada. Ademas, e camara por capta peligernan potencial y detecta irregularidadnan como tambe colecta data relevante cu ta yuda den un maneho eficaz di operacionnan diario di Aduana. Eventualmente e paso pa instalacion di e camara ta pa fortalece e confiansa publico y mantene integridad den nos servicio”.

NO TA AFECTA PRIVACIDAD DI PASAHERO

Gerencia di Aduana a sigura cu e procedemento di instalacion di camara no ta bai afecta e derecho di privacidad di ningun pasahero y ta sigui dedica na mantene un ambiente laboral sigur, placentero y confiabel pa tur nos empleadonan como tambe biaheronan y stakeholders. NOTA: E potret cu ta acompaña e articulo ta uno di archivo di noticiacla di un otro accion na aeropuerto na augustus di 2018.