Minister Dowers sorprende kazerne di bombero y topa situacion fastioso

ORANJESTAD - Diaranson mainta, Minister di Husticia mr. drs. Arthur Dowers a haci un bishita di sorpresa na Post Oscar, cu ta e Kazerne di Brandweer situa na Aeropuerto Internacional Reina Beatrix. Aki e mandatario a topa algun cos fastioso. Area cu hopi sushi, falta di material, y mucho mas. Minister Dowers a topa cu e personal di brandweer cu a dune un recorido improvisa rond di e facilidad y a splica e mandatario di husticia di tur e retonan cu nan tin desde algun aña atras. 

FALTA DI PERSONAL

Tin un falta enorme di material pa e personal por bay den accion di manera efectivo y sigur, manera brandweerpak nobo, mirando cu e personal tin cu recicla esakinan apesar cu nan a surpasa nan uzo maximo. Post Oscar ta cumpli minimal cu e ekiponan manera e Aircraft Rescue and Fire Fighting trucks miho conoci como "crashtrucks" pa por sirbi aeropuerto, pero tin un necesidad enorme pa por yega e nivel sigun normanan internacional.

LUGAR HOPI SUSHI 

Minister Dowers ta consciente cu tin un plan pendiente pa expande y renoba e facilidad na aeropuerto pero ta lamenta si cu e parti di limpiesa y mantencion di e facilidad existente ta un problema structural cu a surgi durante di e ultimo 7 añanan. Ademas e personal di Post Oscar ta traha den un situacion deplorabel y e ultimo controlnan cu a tuma luga a indica cu e post aki no ta na e nivel cu e mester ta. Prome cu merdia ya caba DOW a tuma accion di limpiesa. 

PERSONAL MOTIVA

Minister ta satisfecho si cu apesar di e situacion deteriora, e personal ta motiva pa haci tur locual ta den nan alcanse pa cumpli cu nan responsabilidad y trece brandweer bek na e nivel cu e mester ta.