Guardacosta a expande buskeda pa yate local Energy, pa area noord di La Guajira,Colombia

ORANJESTAD – Buskeda pa e cuater tripulantenan riba e yate Energy, a continua dialuna mainta segun vocero di Guarda Costa Miguel Gonzalez Perret Gentil a confirma pa Noticiacla. Ademas a confirma tambe cu a expande e area di buskeda den e parti Noord di La Guajira di Colombia, pa cual a haya permiso pa bula cu nan avion Dash den e espacio aereo colombiano. Ta for di diadomingo, Guarda Costa ta envolvi den e buskeda pa e yate y su tripulantenan, despues cu marduga diadomingo e melding official a drenta di e situacion di e yate. Famianan ta wordo informa continuamente tambe pa Guarda Costa. Hunto cu esey, tin varios boto y amigo envolvi cu e buskeda. No ta conoci si, si mirando cu a expande e distancia, e botonan ta sigui aki tambe. Riba rednan social mientrastanto, amigonan a activa nan rednan pa mas hende ta envolvi sea den buskeda, of resamento pa e bienestar di e 4 tripulantenan Davey Croes, Marcelo Heyden, Jarred Croes y Aischell Tromp. Noticia den proceso.