Grupo di inversionista kier revitalisa Oranjestad y a informa gobierno

ORANJESTAD  - Recientemente un grupo di inversionista local cu ta yama nan mes Oranjestad Investors Group (OIG) a reuni cu algun mninister, y a presenta nan plan pa  revitalisacion di Oranjestad, combinando e encanto di pasado cu e vision di futuro. Cu e vision aki kier trece un balansa den biba, traha y explora den e centro di Oranjestad. 

E GRUPO

OIG a cuminsa como Wilhelmina Investors Group (WIG) cu tabata tin como meta pa renobo, restaura y inverti den revitalisacion di Wilhelminastraat. Cu ampliacion di e grupo, cu awo ta conta cu 12 inversionista, a dicidi pa bin cu e iniciativa pa busca un team di experto pa bin cu un plan strategico, no solamente pa revitalisa Wilhelminastraat, pero pa haci esaki pa  ful e centro  di Oranjestad.

GOBIERNO

Segun minister di economia Geoffrey Wever, e plannan aki ta cuadra cu e vision di Gabinete AVP-Futuro, cu den su Programa di Gobernacion a acorda cu lo revitalisa centro di Oranjestad cu vivienda y area pa actividad social. Minister President Mike Eman y Minister Geoffrey Wever a elabora riba e importancia pa sector priva traha hunto cu Gobierno y cu Gobierno AVP-Futuro tin e revitalisacion di Oranjestad como un dia nan prioridadnan.