Aruba ta despedi di un pionero di turismo Roderick ‘Rory’ Gilbert Arends

ORANJESTAD - Diahuebs atardi a tuma luga e conmovedor despedida di Sr. Roderick ‘Rory’ Arends den Pro Catedral San Francisco di Asis na Playa. Riba 30 di juni ultimo Aruba a keda sorprendi cu e noticia di fayecimento di e “doctor di turismo”, Sr. Roderick Gilbert Arends. Miho conoci como Rory. Minister Wendrick Cicilia como mandatario cu e cartera di turismo, a expresa cu como generacion nobo, e ta honra e bida di un pionero cu a nifica asina hopi pa pais Aruba. Cu gratitud pa tur locual cu ta construi awe riba e fundeshi fuerte cu nos pionero- y legendarionan cu hopi sacrificio, a laga pa nos.

Rory tabata un personahe ehemplar y respeta p’e industria di turismo. A sirbi como ex- presidente y CEO di AHATA durante e periodo di aña 1990 pa aña 2000. Ademas a desplega un bunita trabou como director na Aruba Tourism Bureau (ATB) durante e periodo di 1985 te cu 1989. Rory tabata un pionero den e transformacion di ATB pa ATA.

Prome Minister Mike Eman a hiba palabra na despedida di un persona cu a para na cuna di e organisacion di turismo di Aruba. Awe a despedi di dje, pero ta para keto un rato y cu sentido di merito pa locual Sr. Rory Arends a nifica pa e industria aki. Si tin un hende cu a biba cu e amabilidad y hospitalidad cu ta representa nos rond mundo, tabata Rory Arends.