Conoce e di 7 minister di Gabinete AVP-FUTURO: Gervais ‘Rene’ Herdé

ORANJESTAD – Manera cu noticiacla a raporta ayera, e di 7 minister di gabinete AVP-FUTURO a huramenta dilanti Gobernador, SE Alfonso Boekhoudt. Mientras cu Herdé ta un persona basta conoci den politica, e pregunta ta, kico mas nos sa y mester sa di e persona aki. 

Ken ta Gervais Rene Herdé?

Gervais Rene Herdé a nace na Aruba, den Companashi dia 16 di september 1951. Yiu di "Louisa Herdé- Amoroso y Felix Romain Herdé, negociante, schutter y manager di restaurant. Banda di hunga baseball Herdé a pasa su hubentud den e club hubenil di "De Trupialen". E experiencianan di su hubentud den Companashi y "De Trupialen" a forma resto di su bida. Rene a caba Colegio Arubano (HBS-B) na aña 1971, y despues a studia politica, maneho y planificacion di enseñansa na Universidad di Leiden, Hulanda. Despues di su estudio sr. Herdé a bolbe Aruba y a cuminsa traha pa gobierno insular di Aruba na 1980 y a fungi como miembro di sindicato SIMAR pa hopi aña. Ademas sr. Herdé a forma parti den varios comision pa prepara Status Aparte. Despues di 1986 ora Aruba a haya su autonomia, sr. Herdé a traha den gruponan di trabou riba e prome plannan pa renobacion di enseñansa, pa e renobacion di formacion di maestro di scol y na e prome plannan pa maneho di idioma y introduccion di Papiamento den enseñansa na Aruba. 

Entre 1987 y 1989 Rene Herde' a traha como hefe di Bureau Organisatie & Efficiëntie encarga cu organisacion di e aparato di gobierno. Entre 1989 y 1992 Herdé a traha na Universidad di Aruba entre otro den creacion di e Facultad Financiero Economico (FEF) y despues a traha den sector priva como director di personal y formacion na ARUBA SEAPORT RESORT entre 1992 y 1994.

Na 1990 Rene Herdé a bira miembro di e partido AVP. E tabata miembro di Conseho di Partido durante di tur eleccion sin ta riba lista. Den e periodo aki ela traha cu minister y politiconan di AVP manera Henny Eman, Watty Vos, Manchi Engelbrecht, Mito Croes, Eddy Croes, Digna Laclé-Herera, Mary Wever-Laclé, Glenda Margaretha, Duke Croes, Roly Bislick, Tico Croes, Ike Posner, Benny Sevinger, Mike de Meza y tur minister y parlamentario den añanan 90 te awe 2025. Na 2005 sr. Herdé a subi lista di AVP pa prome biaha y na 2009 a drenta Parlamento di Aruba y a bira Lider di Fraccion. Den Parlamento a fungi den diferente comision y e ta presidi e comisionnan di 'Finansa & Economia' y di 'Asunto di Reino y Asunto di Exterior'. Na 2017 a clausura su carera profesional y politico, pero a keda activo den partido AVP. Na 2025, Partido AVP a acerca sr. Herdé pa bira e Minister Plenopotenciario di Aruba na Den Haag den Gabinete AVP- FUTURO.

Rene Herdé tin dos ruman mas grandi, Emile Herdé y Bianca Tobin. E ta casa cu Lucy Peterson y tin tres jiu, Paolo, Dinotra y Eva Maria. E tin tres nieto, Zoë, Dex y Ivy.

Minister Herdé a duna di conoce cu e ta cla pa traha. "Traha cu un plan y cu hendenan cu tin experiencia”. Segun Minister Herdé, e no ta un ofensa pa ta un pensionado, haciendo referencia na e critica riba media social. Minister Herdé sigur no tin miedo pa traha cu e generacion hoben, ta habri pa ideanan nobo y ta conta cu sosten grandi tanto den partido como den parlamento.