Eman: Buskeda pa un minister plenipotenciario nobo di Aruba pa Hulanda ta cuminsa awor

ORANJESTAD – E buskeda pa un minister plenipotenciario ‘nobo’ pa Aruba na Hulanda, ta cuminsa awor, segun prome minister Mike Eman diaranson despues di huramentacion di drs Rene Herde como e di 7 minister di gabinete AVP-FUTURO. Segun sr Eman, no ta mucho logico cu mescos cu e caso di sr Herde, e minister plenipotenciario ‘nobo’ tambe ta bira uno ‘temporal’. Esaki ta nifica cu e posibilidad pa Herde asumi e tarea original palabra, cu ta minister plenipotenciario na Hulanda, ta bira nulo. E lo fungi como e di 7 minister, te ora cu e no ta necesario mas. 

DIFICIL PA HAYA UN PERSONA PA HULANDA 

Segun sr Eman, ta hopi mas dificil, pa haya un persona disponible pa bay Hulanda pa e funcion aki, cu ta rekeri cambio di lugar, bida etc, y cu ta dispuesto pa haci esaki ‘pa un rato so’. Pues e persona cu ta bira e minister awor, ta keda e minister den e funcion, pa e tempo di e periodo di gabinete AVP-FUTURO. Esaki kier men cu fuera di e buskeda, ta inclui e proceso di screening, cu ta bay tuma su tempo. Pues pa un periodo largo, Aruba lo keda sin un minister plenipotenciario fiho. Ta interesante cu a pidi e minister plenipotenciario anterior pa keda un tempo extra, dunando tempo pa esun di e gabinete aki, keda cla. A resulta cu e tempo cu a duna e ex minister un tempo, cu a vence, te cu e persona ey a bin Aruba. E posicion lo tin cu wordo haci pa e actual hurista di Arubahuis, sra Shandra John. 

DE MEZA

E persona originalmente (y ainda) poni pa bira e di 7 minister, estra Mike De Meza a haye den problema ora cu Ministerio Publico a cataloge como un sospechoso den un investigacion andando. De Meza lo sigui bringa su caso, pa despues e por bira minister si e logra vence e obstaculo legal aki y demas obstaculonan cu ta strob'e di bira minister. No ta conoci con largo e proceso aki lo ta, y mientrastanto e lo tin cu fungi como parlamentario. 

AUSENTE

Loke ta interesante y cu partido di oposicion MEP a alerta p’e caba, ta cu pa e ultimo lunanan, de Meza tabata ausente den Parlamento, siendo cu e ta cobrando su salario di parlamentario. No ta conoci pakico de Meza tabata ausente y si esaki tabata intencional debi na e situacion cu e tabata aden, bringando varios caso den corte. No ta conoci cu awor cu sr Herde ta asumi e funcion, cu de Meza ta bolbe Parlamento como un parlamentario y asumi su responsabilidad como tal.