Malcontento den AVP cu Eman a presenta Herde como minister ayera!

ORANJESTAD – Tabatin problema basta serio den seno di e partido berde AVP, cu a practicamente bolter tur cos den e partido diamars atardi cu a pone cu ainda no por a anuncia un minister nobo pa AVP. Noticiacla a compronde cu despues cu Mike Eman a bishita gobernador Boekhoudt durante un audiencia semanal diamars merdia, e la bolbe seno di partido, y lo a participa cu e la propone Rene Herde como minister cu tin cu reemplasa Mike de Meza, temporalmente, manera cu a acorda. Sinembargo, pa sorpresa di Eman, esey lo no a cay den bon tera den e partido, pa cual dificilmente Eman por a sali afo y anuncia e decision cu e la participa algun rato prome na gobernador. Noticiacla a compronde cu tin varios ‘grupo’ interno cu ta bringando e nombracion aki, indicando cu tin otro personanan cu merece pa haya e posicion aki. A compronde cu entre candidatonan, tin e.o. Clifford Heiliger, Jennifer Arends, y Marlon Sneek. Ora cu a bira conoci cu Eman a toch propone Herde na gobernador, a surgi un disgusto interno, cu te na e momentonan aki, no tabata resolvi. 

KICO AWOR

E proceso normal, ta cu unabez cu e formador of den e caso aki, prome minister propone e candidato pa minister na gobernador, cu gobernador na su turno, mester pidi sentimento di Parlamento. Si resulta cu Parlamento no ta aproba e candidato, e ora Eman mester busca otro persona y Gobernador no por nombra of huramenta e candidato. Lo tin cu wak kico ta pasa y cu mirando e situacion, si Gobernador ta sigui normal cu e proceso, mirando cu, conforme informacion cu tin, cu Eman a presenta Herde como minister y no a revoca esaki. Por lo menos asina e informacionan den seno di partido berde ta mustra. Noticia ta den proceso.