Secretario di estado nobo di Reino ta mantene maneho di antecesor Szabó pa loke ta Aruba

DEN HAAG/ ORANJESTAD – E secretario di estado hulandes nobo pa asuntonan di Reino, Eddie van Marum lo mantene e maneho di su antecesor Szabó pa Aruba pa loke ta keda di e tempo cu e gobierno demisionario hulandes ta keda sinta. Asina e la contesta Noticiacla dialuna mainta durante un prome conferencia di prensa cu e mandatario cu miembronan di prensa di islanan ABC, di cual Aruba tambe tabata participe. E maneho pues ta continua pa loke ta e asunto di e Rijkswet pa supervision financiero pa Aruba, unda cu e ta sperando riba e concepto di ley pa e wordo entrega na tanto Tweede Kamer di Hulanda como Parlamento di Aruba. 

NO A PAPIA CU MINISTERNAN DI ARUBA AINDA 

E mandatario a bisa tambe cu e no a papia ainda cu ministernan di Gabinete AVP-FUTURO, pero si cu e representantenan. A confirma tambe cu entre 10 pa 15 di augustus proximo, e mandatario lo bishita Aruba, Bonaire y COrsou y proximamente lo sigui e agenda exacta y fecha pa cual e lo ta na Aruba.