Analisis: Awor cu OM a bisa de Meza cu e TA sospechoso

Scirbi pa Tito Laclé

Un persona hopi tempo pasa, a bisa mi y siña mi e frase aki na hulandes: Niet naar de bekende weg vragen. No haci un pregunta, riba cual bo sa, of ta sospecha e contesta caba. Y esaki por wordo usa awe den e caso ‘novela’ estilo Netflix, di candidato pa minister, Mike de Meza. Novela pa esnan cu ta sigui esaki. Pa sr. de Meza, mi ta compronde sigur, cu e ta un situacion hopi fastioso, loke ta conta pa su famia tambe. No sa kico ta warda bo, y e inseguridad rond di bo destino. Pero pa e resto di comunidad, esaki ta manera un serie traha pa Netflix. Y e ta un serie, cu manera cada capitulo, ta laga bo keda cu gana pa wak (of lesa) e siguiente capitulo, ya cu cada capitulo ta caba manera un ‘cliffhanger’. Un final cu suficiente ingrediente di suspenso, lagando bo cu gana pa e siguiente. 

E SENTENCIA ANTICIPA

Enfin, bek pa e sentencia anticipa di awe mainta. Cumpliendo rapidamente cu orden di huez, (aunke e por a apela dentro di tres dia contra e sentencia), Ministerio Publico diaranson laat den mainta, a manda un carta pa sr. de Meza via su abogado. E sentencia di e huez ta e base huridico cu OM a usa, pa informa sr. de Meza, cu enberdad, manera cu el a tende caba via di e formador Eman, e ta un sospechoso den un lopend onderzoek y cu ta cua articulo di ley e sospecho aki ta basa riba dje.   PERO, di e declaracion anterior di OM nos sa cu sr. de Meza awor aki no ta wordo persigui (vervolgd) ainda. Cu e carta di awemainta, Ministerio Publico a cumpli cu e sentencia dicta algun ora prome, unda cu huez a ordena Ministerio Publico pa dentro di 14 dia, informa sr. de Meza si e ta un sospechoso, y duna e cualificacion di e strafbare feit. Mi a bisa aworey  tambe, cu Ministerio Publico por a apela e sentencia di awe mainta. Pero, den e caso aki, esey no tin mucho sentido mirando cu huez a pone den su sentencia awe tambe, cu e sentencia ta ‘uitvoerbaar bij voorraad’, osea cu mester implementa e sentencia mesora, irrespecto e chens pa apela. 

NIET NAAR DE BEKENDE WEG VRAGEN

Pa bin bek riba e dicho hulandes, ‘niet naar de bekende weg vragen’, por nota lo siguiente: Bo a pidi pa clarifica, aunke bo tabata sa e contesta caba. Y cu e contesta aki, sr de Meza definitivamente no por bira minister, manera e huez mes a remarca na e parti di ‘belangenafweging 4.11’ di e sentencia: “Immers: reeds het bestaan van een dergelijke verdenking zal er in het geval van verzoeker op zichzelf direct toe leiden dat zijn voordracht als minister niet kan worden bevorderd”. Na papiamento crioyo: Al fin al cabo: e existencia di un tal sospecho den caso di e peticionario ariba su mes, lo pone cu su nominacion como minister no por wordo haci. 

BO TABATA SA 

Awor, ora cu mi bisa, ‘bo tabata sa’, ta pasobra, si bo ta corda ainda,  e abogado mes a bisa huez den cort, cu ta prome minister ta esun cu a bisa de Meza, cu de Meza ta un sospechoso. Pues, bo (de Meza) tabata sa, pasobra nan a bisa bo. Awe bo a tende oficialmente, cu bo ta un sospechoso. Y tambe pakico, aunke cu Ministerio Publico a sigura cu esaki no tabata necesario pa bisa. De Meza a tende cu ta conforme articulo 68, cu ta regarda pago laat di impuesto, pa cual tin un castigo minimo di prizon y of multa mara na dje. 

E CONTESTA DI OM

Bek pa e contesta di Ministerio Publico. E prome parti ya caba ta bira un echo cu de Meza no por bira minister. Pero, no lubida cu den e dossier di sr. de Meza tin ainda un resultado di screening tambe tocante su “fiscaal gedrag” cu ta negativo. Pues ta un acumulacion di motibo tin awo a base di cua un nominacion como minister NO por wordo haci door di sr. Eman. Awo esakinan a bira cla pa sr. de Meza, pero pa sr. Eman nan tabata conoci caba. Y basta tempo caba.

PAKICO NO A BISA NADA PROME

Henter e asunto a bira un novela, ora de Meza a haya sa via su amigo prome minister Eman, cu e ta un sospechoso, ora cu net Eman tabata dispuesto pa nomin’e ( de Meza) como minister APESAR di e resultado negativo pa cu impuesto. Colon a hera kima, pasobra segun e abogado, Ministerio Publico no a notifica e sospechoso mes. Pero, y lesa bon atrobe, e notificacion di OM na Gobernador y formador den cuadro di ley di screening TA secreto y NO por wordo comparti cu e candidatonan. Esey ta conta pa TUR e instancianan cu ta haci screening. Y corda cu tabata trata un proceso mara na ley di screening. Awe de Meza y famia, y su sostenedornan a haya e berdad amargo, cu e ta un sospechoso. Y cu por lo pronto, e no por bira minister. E bon ta, si bo por yama esaki bon anto, cu e sa awor unda e ta para. E ta conta tambe pa su amigo, prome minister Mike Eman cu sa awor kico e tin cu haci. No tin duda, y  e caminda ta cla. Sr  Eman sa kico pa haci. E ta mustra, cu e serie aki ta yegando su final. E pregunta ta, cuanto capitulo mas Eman ta duna e serie aki? Awor, si e ta bon of no cu tur esaki ta sosode, no ta keda na mi, of abo. Ami ta analisa e situacion, y pone den un forma cu e ta cla, y por ta te hasta, mas cla. Nada mas, nada menos. Manera e portal ta bisa.. Noticiacla. Informacion, cu ta duidelijk pa bo compronde. Ban wak, con largo e serie ta bira. Pasobra den politica na Aruba, ora bo a kere cu cos a caba, ata e drama ta tuma otro rumbo.