• Front Page
• Politica
• Local
  • Social
  • Polis
  • Corte
  • Economia
• Internacional
  • Corsow
  • Region
  • Hulanda
• Deporte
• English
• Opinion
• Live

• Front Page
• Politica
• Local
  • Social
  • Polis
  • Corte
  • Economia
• Internacional
  • Corsow
  • Region
  • Hulanda
• Deporte
• English
• Opinion
• Live

Analisis: Ken a 'mete' la pata aki den caso de Meza?

Scirbi pa Tito Laclé

E caso sumario awe entre politico Mike de Meza y Ministerio Publico, no a trece e claridad pa e ‘peticionario’, (e persona cu a solicita e caso), den e caso aki, de Meza. E caso, contrario na loke hopi kier laga bo pensa y kere, tabata solamente pa e demandante, den e caso aki,  tambe de Meza, haya claridad tocante cua delito e ta wordo sospecha di a comete. E caso NO tabata pa bringa of kisas hasta deshaci di e sospecha cu Ministerio Publico tin contra de Meza. Irespecto e sentencia di huez den esaki, de Meza por lo pronto ta keda como un sospechoso, cu ta un motibo mas pa cua pa ley (di screening), e no por bira minister awor. 

PORTA CERA

E caso tabata tras di porta cera, pues prensa (nos) NO tabatin aceso na e loke a pasa paden. Despues, pafo, abogadonan di de Meza a splica cu pa nan, e caso a bay bon, y cu nan tin tur confiansa den cu e huez lo duna nan razon. Huez a bisa cu pa otro siman, of dentro di un siman, e lo dicta sentencia pa e caso aki. A compronde tambe, di e abogado di de Meza, cu huez lo a haci yen di pregunta den direccion di Ministerio Publico, pero cu no a haya contestacion. Loke ta logico, pasobra ley di screening ta impedi Ministerio Publico divulga informacion di e proceso di screening. E abogado e confirma cu Ministerio Publico no kier a bisa si e cliente tabata un sospechoso. Y claro, e ora no por bisa tampoco di kico.

COMUNICADO DI OM

Algun rato despues, Ministerio Publico a emiti su propio comunicado cu informacion cu a ‘bruha’ hopi hende. Mayoria, ta pasobra en general e nivel di conocemento di ley ta stroba pa por compronde e situacion y e anuncio di Ministerio Publico. Y consecuentemente, varios a cuminsa interpreta e comunicado, como algo faborable den direccion di de Meza, lesando cu ‘de Meza no ta sospechoso, pasobra no ta persiguiendo de Meza (actualmente)’. E pregunta ta: Bo por ta un sospechoso den un investigacion, sin cu formalmente a wordo dicidi pa persigui bo persona? Aki ta unda e comunicado di Ministerio Publico no ta laga lugar pa duda: SI! Pero si formalmente bo no ta wordo persigui, e caminda ta liber pa bira minister, toch? No. No si bo ta sospechoso di un investigacion andando. 

PERSECUCION

Mi no ta pretende di ta un experto di ley, ni abogado. Pero ora bo rondona bo mes di hende cu sa, e ta duna bo un bista real legal di e situacion y e ora por splica e situacion di un forma mas ‘simple’, pa bo compronde. Pasobra mi ta sigur, cu mescos cu mi, nos conocemento di ley, por tey, pero no completo. 

Berdad cu Ministerio Publico a bisa den su comunicado, cue no ta persiguiendo de Meza. Loke cu OM kier men, ta cu no tin persecucion (vervolging) formal. E realidad segun e comunicado, ta cu de Meza no ta wordo persigui ‘ainda’ pa un posibel acto penal. Esey ta loke e kier men. Esey, esta pa persigui of no, OM por dicidi ainda pa haci DESPUES di caba di investiga e caso. Pero segun ley di screening, OM mester informa Gobernador y formador si un candidato ta “sospechoso” den un investigacion cu NO a wordo afgerond ainda, HASTA si e “vervolging” no ta un echo ainda. E notificacion di OM na Gobernador y formador den cuadro di ley di screening ta secreto y NO por wordo comparti cu e candidatonan. Esey ta conta pa TUR e instancianan cu ta haci screening.

CON E SITUACION TA?

Dus al final e situacion ta asina: Mike de Meza  ta sospechoso den un caso andando na OM, cu ta wordo investiga awor. E investigacion por guia na sepone e caso (stop e caso), of entama un persecusion formal. E decision ey no a wordo tuma ainda. Pero e simpel echo cu e ta un sospechoso ta pone cu segun ley di screening, e (esta de Meza) no por bira minister. No ta importa si ami of abo kier of no. Ley ta ley. 

NOTIFICA

Si OM dicidi pa sepone e caso, ningun hende ta wordo notifica di nada. Pero si OM dicidi pa cuminsa cu persecusion (vervolging), basa riba nan investigacion, e ORA nan lo notifica e persona en cuestion, mas pronto posibel.

Mike de Meza ta pendiente di dos notificacion MAS PRONTO POSIBEL: di Minister Presidente, cu e no por bira minister, y di OM, cu e lo por wordo persigui door cu e ta sospechoso pa cierto delito. Asi de simple, e caso ta. Dus nada no a bruha, y no tin nodi di bruha nada, pasobra tur cos ta hopi cla. E pregunta miyonario ta ... cu ki meta, y KEN, a informa de Meza cu e ta un sospechoso? Pasobra OM ta confirma den nan comunicado cu NINGUN hende of instancia mag divulga informacion di screening!..Tik, tok, tik, tok…