- Gabinete Pisas a pidi retiro di dos di su ministernan di su gabinete
- Opinion: E post cu tur sa tabata bin: clapchi.
- AZV a lanza logo relaciona cu 25 aña di seguro AZV
- VIDEO: Grupo di prensa local a conoce e restaurant mas nobo ‘Gaia House of Grill’ na JOIA Aruba
- Famia di turista cu a muri tragicamente na Aruba, ta papia, y curpa ta 'pega' na Aruba ainda
Top ehecutivonan di crucero ta e siman aki na Aruba
ORANJESTAD - Aruba lo ta anfitrion oficial di e conferencia di crucero Platinum Associate Membership Advisory Council (PAMAC) 2025, un di e eventonan mas importante y reconoci pa e industria crucero na Norte America, Latino America y Caribe. E evento importante aki ta organisa pa Florida-Caribbean Cruise Association (FCCA) y pa e edicion aki ta patrosina a traves di un partnership entre APA y A.T.A.
OCHO AÑA PASA A BIN CABA
Na aña 2017, Aruba tabata anfitrion caba di e reunionnan di PAMAC y ta hopi contento di por yama bonbini atrobe na e prestigioso evento e siman aki. Tanto APA como A.T.A. tin lunanan caba ta preparando pa por brinda un experiencia sin igual na tur e ehecutivonan di e industria crucero cu lo bishita nos isla e siman aki. E ultimo PAMAC a tuma luga na Jamaica, pues ta un bon chens pa Aruba por “showcase” nos destinacion dilanti tur esnan cu ta tuma decision riba iterinario y rutanan cu e liñanan crucero ta opta p’e. E conferencia di PAMAC ta un plataforma popular cu ta inclui presencia di alto ehecutivonan di e industria di turismo crucero, tanto di liñanan crucero como di otro partnernan den e industria.
TEMA DI E AÑA AKI
Un aspecto clave cu e PAMAC Cruise Summit 2025 lo trece pa Aruba ta e oportunidad pa showcase desaroyonan recien, actividadnan y excursionnan disponibel riba e isla como tambe e proyectonan di mehoracion mas importante cu ta andando y tin na caminda. Adicionalmente, e conferencia lo enfoca riba varios topico importante, incluyendo atrae cruceronan mas chikito y luhoso, sin lubida e intencion di por atrae crucero durante e temporada abou. Meta di e iniciativa aki ta pa engrandece e experiencia di Aruba y promove crecemento sostenibel den e industria crucero. Sostenibilidad ta keda un tema central den e industria di crucero y e conferencia aki lo pone enfasis riba su importancia door di alinea e strategianan di Aruba cu e industria mundial di crucero.
ATENDENCIA RECORD
For di momento cu ehecutivonan di APA y A.T.A. a anuncia e intencion di Aruba pa ta “host” di e evento di e aña aki, mesora e entusiasmo a lanta entre e ehecutivonan participante. Na dado momento mester a limita participacion pasobra e demanda a surpasa tur expectativa, pasando riba 200 participante e aña aki. FCCA ta consider’e un record di atendencia. Tanto APA como A.T.A. ta convenci cu e demanda pa bishita Aruba, pa check e avansenan y con nos isla a desaroya den un di e destinacionnan di mas bunita, limpi y sigur den Caribe, ta loke a atribui na e interes aki.
TRES DIA INTENSIVO
Un PAMAC Cruise Summit tipicamente ta dura dos pa tres dia y ta inclui un variedad di actividad manera reunionnan, funcionnan y excursionnan. E prome dianan ta facilita interaccion entre ehecutivonan di crucero, partnernan local y representantenan di gobierno. Ta considera e interaccion aki como crucial, prome cu e ehecutivonan di crucero reuni cu e miembronan ‘platino’ mes. Mayoria di e participantenan lo bandona Aruba diabierna mientras otronan a scoge pa plak algun dia di vakantie su tras y asina ta pasa weekend na “e isla feliz”.
INVERSION PA MEHORACION
Ultimo añanan, Aruba a conoce varios construccion y renobacion cu a conduci na haci nos isla mas popular y competitivo como destinacion turistico di prome clase. Ambos entidad, tanto APA como ATA a inverti masha den mercadeo, den promocion y den estrecha laso cu e liñanan crucero pa atrae no solamente mas “calls”, sino specialmente den atrae cruceronan mas chikito pero cu miho calidad di pasahero. Esey ta obvio tambe den con a logra subi e cantidad di placa drasticamente cu casa pasahero ta laga atras na Aruba.
MANTENCION DI FACILIDADNAN
No solamente pa inversionnan haci den exterior sino tambe localmente, pa por a mantene y hasta crea areanan nobo unda e turista crucero por pasa su dia na Aruba. Via fondonan di ATA a percura pa henter un skema di mantencion di e areanan turistico mas uza pa nos turistanan. Den area di waf tamnbe a realisa hopi trabou, asina APA a crea baño y mas espacio pa sinta pa e pasaheronan y diferente otro mehoracionnan mas.
EMBEYECE E AREA DI WAF
No por lubida di menciona cu e mesun APA y ATA a cera cabes den un inversion miyonario pa renoba y modernisa henter e edificio bieu di DOW situa dilanti porta di waf. Ey lo bira oficina di APA mientras cu abou lo bira un Visitors Center virtual maneha pa ATA. E pasaheronan lo topa cu un experiencia unico y por cera conoci mas di cerca cu nos isla como destinacion pa nan scoge riba nan siguiente vuelo di estadia na nos isla.
BAN MUSTRA NOS MIHO CARA
Aruba cu e siman aki ta anfitrion di e PAMAC Cruise Summit 2025 ta un testimonio di e compromiso di Aruba pa excelencia den e industria di turismo. Ministerio di Turismo, Aruba Tourism Authority (ATA) y Aruba Ports Authority N.V. (APA) ta anticipa cu entusiasmo e oportunidad pa showcase tur locual Aruba tin di ofrece, incluyendo ofertanan pa engrandece y fortalece relacionnan fuerte cu ehecutivonan di e liñanan crucero.
TOCANTE FCCA
Florida-Caribbean Cruise Association (FCCA) ta un asociacion n cu ta consisti di 23 liña miembro cu ta opera casi 200 barco den laman di Florida, Caribe y Latino America. Funda na aña 1972, e meta di FCCA ta pa provee un foro pa discucion riba operacionnan di crucero, desaroyo turistico, wafnan, operacionnan di tour, siguridad y otro asuntonan di e industria crucero. Door di fomenta mas comprendemento di e industria di crucero y su practicanan di operacion, FCCA ta busca pa construi relacionnan cooperativo cu su destinacionnan partner y pa desaroya partnershipnan bilateral productivo cu cada sector. FCCA ta traha cu gobiernonan, wafnan y tur representante di sector priva/publico pa maximisa gastonan di pasahero crucero, liña crucero y empleadonan di liña crucero, y tambe mehora e experiencia di destinacion y e cantidad di pasaheronan crucero cu ta regresa como bishitante stay-over despues.
Aruba Tourism Authority Sui Generis ta celebra 15 aña
ORANJESTAD - Aruba Tourism Authority Sui Generis ta celebra 15 aña. Con ta midi diescinco aña di un entidad nobo cu a nace pa promove desaroyo, innovacion y crecemento di nos economia a traves di nos unico pilar, turismo. Di aña 2011 pa awo, “Tourism Receipts” a aumenta cu 94%, yegada di bishitante a aumenta cu 43%, “RevPAR” a crece cu 82%, mientras cu yegada di turismo crucero a crece cu 36%. E cifranan aki ta subraya e exito y desaroyo sostenibel di e sector turistico di Aruba, desde cu a funda Aruba Tourism Authority Sui Generis.
Aerolíneas Argentinas ta lansa servicio directo nobo entre Argentina y Aruba
ORANJESTAD - Aerolíneas Argentinas ta lansa servicio directo nobo entre Argentina y Aruba. E vuelo inaugural a sali for di Aeropuerto Internacional Ezeiza (EZE) cu tur 170 asiento completamente ocupa, reflehando e demanda fuerte di mercado y un contesta sumamente positivo di parti di e biaheronan Argentino. Pa celebra formalmente e momento, tabatin un ceremonia inaugural cu a tuma luga riba dia 8 di januari, na Aeropuerto di Aruba, treciendo hunto e stakeholdernan clave di gobierno, aviacion y turismo. E celebracion a conclui cu un ceremonia tradicional di cortamento di cinta y cortamento di bolo, oficialmente yamando bonbini na Aerolíneas Argentinas na Aruba.
DIMP: Ultimo dia pa paga impuesto di vehiculo di motor ta 2 di februari 2026
ORANJESTAD – E ultimo dia pa paga impuesto di vehiculo di motor di aña 2026 ta 2 di februari 2026. Normalmente e fecha final ta 31 di januari, pero debi cu e aña aki e fecha aki ta cay riba diasabra, e fecha final ta bira dia 2 di februari 2026. Aki ta sigui mas informacion.
DIMP: Pensionadonan ta paga menos na prima di AZV awor
ORANJESTAD – Departamento di Impuesto a informa tur pensionado y nan doño di trabou, cu entrante 1 di januari 2026 e prima di AZV ta wordo reduci pa e pensionadonan cu tin e edad di 65 aña of mas.Durante aña 2025, e pensionadonan tawata paga 5% riba e prome Afl. 30.000 di entrada of salario (di un empleo den pasado). Si e entrada of salario aki surpasa Afl. 30.000 pa aña, e pensionado ta paga 10,5% na prima di AZV riba e suma restante. Awor entrante 1 di januari 2026, e porcentahe riba e prome Afl. 30.000 di entrada ta 0%. Pues un reduccion di 5%.
Reglanan importante na Aruba pa control riba construccion y demolicion aplicabel awor
ORANJESTAD – For di 1 januari 2026, ta bini na vigor regulacionnan adicional di e Bouw- i sloopverordening di Aruba. E caminda aki ta duna gobierno mas poder pa tuma medida contra construccion i demolicion ilegal, y tambe pa reclama gasto for di e persona cu ta comete infraccion. Esaki ta segun un landsbesluit cu a wordo firma 23 december 2025 y publica den Afkondigingsblad di Aruba. E Bouw- i sloopverordening tabata parcialmente na vigor desde november 2022, pero hopi articulo importante no tabata activa ainda. Cu e landsbesluit nobo, ta wordo pone den vigor esnan cu ta referi na handhaving administrativo, seguridad legal y reclamo di gasto. Ta trata di articulo basico cu ta esencial pa supervision y actuacion efectivo di gobierno.
Den caso di cancelacion di buelo, unda e responsabilidad di aeropuerto ta cuminsa y caba?
ORANJESTAD – Den caso di cancelacion di buelo, unda e responsabilidad di aeropuerto ta cuminsa y caba? Despues di e situacion di fin di siman unda cu buelonan di Merca y Europa a cancela pa Aruba, e pregunta a surgi, ken ta responsabel pa kico. Noticiacla a haci e pregunta ey diamars na e CEO saliente di aeropuerto di Aruba, James Fazio. Wak e entrevista AKI.
Follow NoticiaCla
