Fraccion di AVP na Ministerio Publico: Conduci bo funcion, rapido, transparente y husto

ORANJESTAD – Diahuebs, fraccion di partido AVP den Parlamento, a manda un mensahe directo y quizas inusual den direccion di Ministerio Publico. Y esaki tabata pa ‘conduci su funcion di un manera rapido, transparente y husto pasobra Aruba merece claridad y progreso y no confusion of stagnacion’. E mensahe aki nan a manda pa mustra nan sosten pa nan colega Mike de Meza, cu ta purbando ainda pa bira minister di e gabinete AVP-FUTURO. Siman pasa, a bira conoci cu e la bira un sospechoso, y esey ta strob’e di bira un minister. 

SOLIDARIDAD

“Den luz di e desaroyonan mas reciente rond di e retonan fiscal/legal cu nos colega di fraccion y candidato pa minister, Mike de Meza ta enfrenta, nos como Fraccion Parlamentario di AVP ta expresa nos solidaridad cu su persona, pero sigur tambe nos preocupacion profundo tocante e dificultad cu e situacion aki ta crea pa nos sistema democratico y e principio fundamental di e Trias Politica na Aruba” e fraccion ta cuminsa na bisa.

FALTA DI TRANSPARENCIA

E fraccion ta tilda ministerio Publico tambe di falta di transparencia e.o. “ E falta di transparencia den informacion, hasta na e persona concerni ta laga espacio pa speculacion”, e comunicado ta sigui bisa. “ Fraccion di AVP ta condena tur tipo di tardamento inusual of calcula den cualkier proceso y sigur den formacion di gobierno of nombramento di un minister. E ta un prijs hopi halto pa Pais Aruba paga ora cu awendia, mas cu nunca, tin mester di solucionnan rapido y acerta”.

TRABOU TRANCA

E fraccion ta recorda cu na e momentonan aki nos infrastructura y energia — sectornan cu ya pa añanan ta manca pa un serie di ley anticua, procedura lento, burocracia y te hasta investigacion administrativo – ta bou un direccion ministerial temporal y limita, mientras cu tin asuntonan nacional urgente cu ta pendiente di un titular cu por dun’e su total y debido atencion. Y pa nan, esaki ta problematico pasobra tanten cu de Meza, cu lo mester a bira minister pa maneha netamente e puntonan ey, no por awor. 

RESPONSABILIDAD

Den un situacion asina, e fraccion ta sinti cu e Parlamento, como un pilar di estado, tin un rol crucial pa asumi su responsabilidad pa urgi gobierno pa tuma accion den e asunto, dialoga cu e partidonan al caso y bin cu un resolucion pronto y definitivo.

MENSAHE PA MINISTERIO PUBLICO

Den mesun rosea, e fraccion ta haci un yamada cla y formal na  Ministerio Publico pa conduci su funcion di un manera rapido, transparente y husto pasobra Aruba merece claridad y progreso y no confusion of stagnacion.