OM: No ta confirma ni nenga cu Mike de Meza ta sospechoso di husticia

ORANJESTAD – Ministerio Publico di Aruba no kier a ni confirma ni desmenti cu candidato pa minister ir. Mike de Meza ta un sospechoso pa e departamento. Riba pregunta di Noticiacla dialuna mainta, e vocero a bisa di lo no duna informacion.  “OM no ta bay duna ningun reaccion riba e pregunta aki”, e vocero a bisa Noticiacla dialuna. E pregunta tabata si ‘enberdad de Meza awor ta un sospechoso di Ministerio Publico. “Ni confirma, ni nenga. Geen comentaar” tabata e siguiente comentario. Pues, for di e banda ey, no lo tende nada (por lo pronto).  

USUAL?

Noticiacla a busca contacto dialuna cu Ministerio Publico riba e tema, mirando cu un dia prome, abogado di de Meza, mr Desiree Croes a sigura cu nan a haya notificacion di OM, cu e cliente de Meza awor ta sospechoso di husticia den un investigacion penal. Y como cu Ministerio Publico no a emiti ningun comunicado, (cos cu nan ta haci si normaal ora cu tin un caso di atencion high profile) pa confirma of clarifica e declaracion di e abogado. Bisando esaki, no tin motibo di duda den e palabra di e abogado, pero semper ta busca tur banda pa haya mas clarificacion. Y sigur mas claridad riba kico exactamente ta sospecha e parlamentario di AVP cu ta candidato pa bira minister. Esaki kier men cu tin cu warda un poco mas, pa wak kico nobo lo Sali for di e asunto aki. 

DIADOMINGO

Tabata diadomingo anochi cu e abogado mr Croes a informa cu OM a informe cu su cliente ta un sospechoso, despues cu e director di departamento di impuesto Luenne Gomez a entrega un keho contra dje algun siman prome. Esaki a crea un situacion nobo den henter e proceso di nombracion di de Meza pa bira minister.