Na Corsou a tira homber mata awe marduga riba Helmin Wiels Blvd

WILLEMSTAD - Awe alrededor di 02.17or di mardugá sentral di polis a risibí notifikashon di un kaso di tiramentu riba Helmin Wiels Boulevard i ku probablemente tin un persona heridá.

Na yegada di e unidatnan polisial na e sitio nan a bin topa ku un Hyundai i10 di dal kontra di kura di Betesda i den e vehíkulo aki tabata tin un hóben ku heridá di bala parti ariba di su kurpa. Sigun promé informashonnan ku polis a risibí, tin indikashon ku un SUV tabata persiguí e vehíkulo aki I dado momentu a bula pasa den nan banda I lòs tirunan dirigí riba e víktima kual tabata manehando e vehíkulo. Debí na e impakto nan di bala ku e la risibí e la pèrdè kontrol riba su stür I bai aksidentá. Den e vehíkulo tabata tin un dama tambe pero esaki no a resultá heridá. Mesora polis a pidi presensia di ambulans na e sitio I a transportá e víktima ku urgensia pa CMC mirando ku su situashon tabata di atenshon.

Mas lat a drenta e tristu notisia ku e hóben a bin pèrdè su bida na CMC. NOTA: Texto ta scirbi den Papiamento fonetico di Corsou.