Minister Wever no tabata na altura di e keho cu director di DIMP lo a entrega na OM

Minister Wever no tabata na altura di e keho cu director di DIMP lo a entrega na OM

Posted on 06/8/2025 9:22 pm AST | Updated on 06/8/2025 9:24 pm AST

ORANJESTAD – Minister di finanza mr Geofrrey Wever, bou di cual e departamento di impuesto DIMP ta cay, no tabata na altura di e acto di e directora, di haci denuncia contra candidato pa minister Mike de Meza.”No” sr Wever a bisa noticiacla diadomingo anochi. “Mi no tabata sa di dje. Mi a scuche awe tardi den e press conference live for di airport”, e mandatario a sigui bisa. Ademas e la bisa cu no ta un regla cu ora cu un hefe di departamento haci algo asina, cu e tin cu avisa su hefe, den e caso aki, sr Wever. Por lo menos, e no na altura di esaki. 

E TAREA DI MINISTER WEVER DEN PROCESO DI SCREENING

Segun e mandatario, e proceso di screening, ta un autoridad, cu segun e, e inspector/director, tine autonoom. “Wetgever a dun’e un tarea y e tarea ey e no ta hirarchisch ondergeschikt na e minister di finanzas. Si e ta otro, e minister di finanzas por influencia e screenings process positivo of negatief”. 

KICO E TA BAY HACI AWOR?

E minister ta bay digest e informacion aki aworaki, pero e no tabatin un contesta definitivo di kico e lo bay haci aworaki. “Vooralsnog mi ta pensa si cu esaki mester cay bou di e autonoom bevoegdheid di e inspecteur”. “Ami no por bis’e (e director di impuesto) kico pa haci den un specifieke zaak!”. 

KICO TA PENSA DI LUENNE GOMEZ

Riba e pregunta di kico e minister ta pensa di e trabou cu su director di DIMP ta haciendo, Wever a bisa cu e la declara na varios ocacion cu e ta kere den e profesionalismo di sra Gomez-Pieters y di e organisacion cu e ta maneha. “Mi no tin nada pa duda den esey. Mi conoce pa hopi hopi aña caba y mi a wak e tempo cu mi tabata fiscalista, y awor mi ta wak e como minister, y den e sentido ey mi ta para tras di con e ta haci su trabou”. Pero riba con Gomez-Pieters a maneha e asunto aki, Wever a bisa di no por huzga, pasobra e no tabatin un rol. “Na momento cu ami bay duna mi opinion, mi ta influencia directo, of indirecto, e screening process. Y esey mi ta kere cu ta hopi gevaarlijk. No tin un rol pa e minister di finanzas. Mi ta kere cu minister di finanzas mester respeta e landsverordening Integriteits minister”. Unico cos cu e minister mester haci, ta duna e departamento e espacio, pa por cumpli cu su ‘wettelijke taak’. 

 

 

  • Powered by SETAR