De Meza: Director di DIMP a entrega keho contra dje, y de Meza ta menasa di bula afo!

De Meza: Director di DIMP a entrega keho contra dje, y de Meza ta menasa di bula afo!

Posted on 06/8/2025 9:03 pm AST | Updated on 06/8/2025 9:04 pm AST

ORANJESTAD – Si minister presidente Mike Eman no actua awor, y acepta e situacion ‘nobo’ cu a surgi, riba e proceso di nombramento di sr Mike de Meza como minister, de Meza ta bula afo. Ta trata di e noticia cu a surgi diadomingo anochi, cu e directora di DIMP a entrega keho na OM contra e candidato pa bira minister, supuestamente pa asuntonan fiscal. E candidato pa bira minister, diadomingo anochi a duna un menshe hopi cla na prensa na aeropuerto despues di su yegada for di Hulanda riba su situacion nobo. “Mi ta bay wak unda parlamento ta para, mi ta wak unda gobierno ta para (riba e asunto aki:red) pasobra si bo ta bay acepta esaki, ruman, ami sigur no kier ta parti di e gobierno aki!” de Meza a a bisa enfaticamente. Cu esaki, e ta confirma cu e tin chens di ‘bula’ afor, si no sali na su defensa. 

KICO A PASA AWOR

Tabata diadomingo mainta cu prensa diripiente a ricibi un invitacion di parti di abogado di ir. De Meza, pa ta na aeropuerto, pasobra ‘na su yegada, de Meza lo duna un declaracion importante na prensa di Aruba”. Y ora cu e parlamentario a yega, e la los un ‘bom’, cu ta hiba e caso di su possible nombracion den henter un otro dimension. Segun de Meza (y e abogadonan), algun ora despues cu huez a dicta sentencia den caso cu de Meza a entama contra DIMP,  nan a haya un notificacion di parti di Ministerio Publico, cu tin un investigacion lo cuminsa awor, basa riba un denuncia cu e directora di DIMP a haci contra sr De Meza riba asunto fiscal. Mientras cu OM a notifica de Meza apenas algun rato despues di e sentencia, ya dos siman prome, e denuncia lo a wordo haci. Kico e denuncia ta exactamente, no ta conoci, pero cu lo cataloga de Meza como un sospechoso den e caso aki. Pa de Meza esaki a bin como un sorpresa, mirando cu durante e caso un siman prome, huez a puntra e directora, si tabatin algo mas cu mester ta conoci, y e directora a bisa cu no. Pues ningun momento den corte, a haci mencion di e denuncia aki. Y esey a sorprende e abogado di de Meza y claro de Meza mes. Nan no por mira esaki di ningun forma otro cu persecucion politico, y cu ta despues cu e sentencia, segun e abogado Croes y sr de Meza mes, e directora a warda wak cu cos ‘no a bay bon’ y cu e ora a usa e arma di e denuncia, pa toch stroba de Meza pa bira minister. 

KICO AWOR

Segun de Meza, e intencion tabata dialuna awor (pa reuni cu prome minister) pa supuestamente finalisa e proceso pa de Meza bira minister, pero awor tur cos ta para atrobe. Esaki pasobra awor, dificilmente prome minister Eman por bay presenta de Meza como minister, si tin un denuncia contra e candidato. Y e ley di screening pa minister, ta prohibi un candidato cu ta sospechoso, pa bira minister. De Meza a sigura cu e ta bay cuminsa cana su caminda pa bringa e punto nobo aki, y ta wak kico ta bin di parti di gobierno. E ta sigur cu cos lo bolbe para y esaki ta nifica cu por lo pronto esaki ta nifica cu e no por bira minister. 

GOBERNA Y NO PARA BRASA HENDE SO

Loke tambe a hala atencion diadomingo anochi, tabata e mensahe cu por compronde cu de Meza a manda directamente pa prome minister. “Na fin di dia, pueblo a vota pa bo. Pa bo goberna e pais aki. Segun reglasnan. Pa bo goberna si. Pa bo tuma decision. No a vota pa bo solamente pa bo cana rond brasa hende. Pa bo tuma decision tambe. Pues bo tin cu tuma bo decision tambe”. Esaki tabata un mensahe directo pa sr Eman, cu ta conoci pa ta brasa hende den comunidad. 

  • Powered by SETAR