Partido ACCION21 a pasa pa historia y a keda disolvi

ORANJESTAD – Algo mas di 5 aña despues di su nacemento, e partido politico ACCION21 ta pasa pa historia. E lider di e partido sr Miguel Mansur a confirma pa Noticiacla cu a disolve e partido, pues e partido ACCION21 oficialmente no ta existi mas. Den e ultimo eleccion parlamentario na december 2024, e partido a obtene 2204 voto, cu no tabata suficiente pa logra mantene nan 1 asiento cu nan a logra na 2021 ora cu e partido a logra 3410 voto. 

RETIRO DI LIDER

“Despues di eleccion, ami a ofrece mi retiro como nos no a logra asiento” Mansur a cuminsa na bisa noticiacla. “ Bestuur a indica cu si ami baha nan tambe lo baha”, e la sigui bisa. “Mi a bisa nan cu unabes e partido chikitonan muri, tin poco evidencia cu nan ta bolbe” e la continua bisando. Nan a warda un periodo di seis luna pa un bestuur nobo. “Awor banco ta declara cualkier persona cu sinta den bestuur di un organisacion politico un PEP (politically exposed person) dus esey a complica formacion di un bestuur nobo cu mester a sigui pa nombra un comision pa busca candidato y otro pa fundraising” e awor ex lider a sigui bisa. Den ultimo conseho di partido 9 april 2025 un miembro a trece dilanti cu nan no kier laga e statuut inactivo. “E no tabata kier a core e riesgo cu den caso gobierno cay, cu un persona of grupo ta tuma over e statuut cu no a ser aproba pa cdp y kisas no ta para pa e principionan liberal progresivo cu a defini ACCION 21. Dus nos a vota pa disolve e partido pa sigura cu e no lo bolbe nace off branding” Mansur a sigui bisa. 

MUCHO PARTIDO

Mansur ta kere cu strategicamente tin demasiado partido na Aruba. “Y una bes bo perde asiento, ta dificil hustifica sigui como un partido independiente” Mansur a sigui bisa. “Ultimo eleccion e grupo mas grandi di votado a kies un partido cu no ta MEP y no ta AVP, pero esey a resulta den unicamente cuatro asiento (menos cu e 5 cu nos tabata tin entre A21, MAS y RAIZ). Obviamente esey no ta e rumbo cu nos lo a desea pero mi ta kere e decision di RAIZ di keda sin forma un bloke na 2021 tabata determinante”. Si e partidonan independiente mes no por uni pa traha hunto, segun Mansur,  ta dificil argumenta cu nan lo logra cambio structural. 

RESTZETEL

Mansur ta kere cu ta improbabel cu MEP ni AVP lo sostene reforma di nos sistema di restzetels paso nan no ta bay di acuerdo cu algo cu lo debilita nan mes. Tur eleccion lo bin partido nobo y semper un organisacion politico nobo tin bentaha paso nan no tin political baggage. “ ACCION 21 a organisa un conferencia ‘Uni pa Aruba’ na September 2022 cu e partidonan independiente pa purba motiva consolidacion mirando cu asina hopi voto ta keda sin representacion” e la sigui splica. “Na 2021 6 mil voto a keda sin representacion y na 2024 ela subi te cu mas cu 9 mil voto (3+ asiento). Tambe despues di eleccion 2021 nos a ofrece e partidonan cu a keda afor, uso di mi asiento pa haci pregunta, haya info etc. Desafortunadamente ni RAIZ ni MAS a participa na e conferencia na 2022 y e esfuersonan pa consolida y reduci cantidad di partido no a sigui” Mansur a sigui bisa. “Atrobe si RAIZ a forma parti di un bloke independiente na 2021 esey lo por a forma base pa mas cooperacion incluyendo na eleccion”.

KICO AWOR? 

Segun Mansur, ACCION 21 a wordo desolvi y nan ta den proceso di disolve e stichting liga na e anterior fraccion ya cu e partido no lo bolbe participa na eleccion. “ Pa mi persona, esey kier men cu actualmente mi ta un politico sin partido y na proximo eleccion mi lo postula riba un lista existente of uno nobo” Mansur a finalisa bisando.

HISTORIA DI ACCION21

E partido a wordo funda dia 18 di december 2020 pa Miguel Mansur.  E inspiracion pa e partido a origina cu un articulo publica 18 di juli, 2020 pa Mansur titula, “Status Aparte: E Caminda pa Prosperidad of Pobresa?”  cu a cuestiona e efekto di e autonomia di gobernacion propio di Aruba for di 1 di januari 1986 ACCION 21 a participa cu un lista di diescuater candidato durante eleccion 2021 na Aruba. E partido a presenta un manifiesto progresivo cu a defende empresa liber, reforma fiscal, derechonan di LGBT, gobierno habri, reforma di ley electoral, derechonan di aborto, eutanasia y legalisacion di cannabis. E partido a ricibi 3.410 voto den eleccion di 2021 y un asiento den e di diesun Parlamento di Aruba. Na 2024 e partido a haya 2204 voto, y a keda pafo di Parlamento.