Aruba a registra su di tres morto di trafico pa 2025

SAN NICOLAS – Aruba a conoce su di tres morto den trafico diaranson mainta trempan, confirma pa e voceru di polis Liliana Rasmijn. E ta trata di un persona stranhero homber di 23 aña. No por a duna dato personal ya cu na e momento ey, ainda no a notifica e famianan. Ta trata di un caso cu a keda raporta pa 8:30am na altura di Grapefield, e caminda di santo tras di KIA, unda cu tres persona tabata envolvi den un accidente cu un pickup Nissan shinishi. Un di e ocupantenan a resulta fatalmente herida, mientras cu dos otro si a wordo transporta cu ambulance pa hospital, y segun Rasmijn, ta leve herida. E motibo di e accidente no ta conoci ainda y investigacion lo determina e causa. Noticiacla ta manda palabra di condolencia na famia di e fayecido.