Aruba awo tin su Atlas di Impacto Climatico

ORANJESTAD – E siman aki, Aruba a lansa un atlas di impacto climatico dedica na Aruba. E portal digital di ‘Climate Impact Atlas’ (CIA) ta mustra e efectonan actual y proyecta pa nos isla. Durante e inauguracion oficial na Universidad di Aruba, varios experto local e internacional a hiba palabra y a elabora riba e desaroyo e importancia di CIA di Aruba.

E Atlas di Impacto Climatico (CIA) di Aruba ta presenta informacion clave tocante e impacto di cambio climatico na Aruba. Aunke varios organisacion publico y priva ta trahando pa mitiga e impacto di cambio climatico, e data cu ta disponibel pa Aruba ainda ta limita y fragmenta. Ademas di data, e CIA ta inclui varios mapa di impacto. Tambe ta inclui storia y ilustracion di impacto climatico na Aruba.

E CIA di Aruba ta e resultado di esfuerso conhunto, treciendo hunto e informacion y conocemento disponibel den un espacio central pa e uzo di diferente stakeholder y sector. E obhetivo ta pa fomenta un comprondemento general y bista mas profundo entre stakeholders riba e riesgo y impacto di cambio climatico pa asina desaroya un resiliencia climatico di un manera husto, transparente y inclusivo.  

E CIA di Aruba ta parti di e Conseho Nacional di Resiliencia Climatico (NCRC) y ta habri pa publico y tur interesado riba e pagina web di NCRC (ncrc-aruba.org). NCRC ta un colaboracion di instancia publico, priva, civil y academico, mescos cu socionan internacional, pa avansa e resiliencia climatico na y pa Aruba. P’esey comparti data climatico ta esencial entre organisacionnan publico y no-gubernamental, mescos cu e sector priva y comunidad cientifico local, regional y internacional. 

E CIA di Aruba ta desaroya hunto cu NCRC y CAS Foundation (Climate Adaptation Services), ademas di varios instancia y experto local, incluyendo Metabolic Foundation (Sr. Tony Sevold), Sra. Rosabelle Illes, Universidad di Aruba, Centraal Bureau voor de Statistiek (CBS), Departamento Meteorologico Aruba (DMA), Directie Natuur en Milieu (DNM) y Aruba Conservation Foundation (ACF). E proyecto ta financia pa e International Panel on Deltas, Coasts and Islands (IPDC) di Hulanda.

Pa mas informacion, por tuma contacto na: climate@ncrc-aruba.org