Bermudez: Inspector di impuesto no mester di permiso pa busca abogado pa DIMP

ORANJESTAD – Un inspector di impuesto (Inspecteur der Belastingen) no mester pidi ni minister di finanzas, ni conseho di minister permiso pa busca ayudo fiscal pa un posibel caso den corte, pero mas bien consentimento. Esaki contrario na declaracion anterior di e minister actual di finanzas, Geoffrey Wever a declara diamars anochi. Ex minister di finanzas Angel Bermudez a sigura noticiacla diaranson merdia, cu e inspector tin e libertad di busca abogado of ayudo legal riba su mes. “Inspector ta keda independiente!” sr Bermudez a sigui bisa. Es mas, segun Bermudez, si e inspector p.e. kier busca ayudo y trece FIOD di Hulanda, e por. “E mester djis informa minister di finanzas, cu na su turno por duna (of no) su consentimento!” sr Bermudez a sigui bisa. E no tin cu ni bis’e pakico. “E no ta un decision di conseho di minister, ni minister di finanzas!”. Si e no haya consentimento, e por haci algo otro.  “Como un ehempel, si DIMP scohe un abogado cu ta kita for di e lista regular di abogado (tableau of bar association), e ora e minister di finanzas por desconseha e escoho. Den e caso aki, nos tin un corte comun, unda cu cualkier abogado den Reino Hulandes por wordo pidi pa sosten”. 

DIFERENCIA ENTRE CONSENTIMENTO Y PERMISO

Mientras cu e palabranan “consentimento” y “permiso” hopi biaha ta wordo usa intercambiablemente, tin diferencianan sutil pero importante, partikularmente den contextonan huridico y interpersonal. Permiso por lo general ta nifica un figura di autoridad cu ta duna aprobacion pa algo sosode, mientras cu consentimento ta nifica un individuo cu ta bay di acuerdo of no di acuerdo cu algo ta sosode, hopi biaha ta ensera un frontera of desicion personal.

KICO A PASA

E conmocion a cuminsa e siman aki ora cu a bira conoci cu e departamento di impuesto (DIMP) a opta pa busca ayudo legal for di Corsou, den persona di mr Mirto Murray. Aki a bin e pregunta mesora, ken a autorisa esaki y si esaki a sosode cu autorisacion di gobierno (lesa: minister di finanza). Diamars anochi den un declaracion cortico na e portal 24ora.com, e minister encarga a desmenti cu e la aproba e decision pa e abogado, y cu esaki lo a pasa ministerraad. E la sigura tambe cu pa DIMP busca e ayudo, e mester haya aprobacion di e minister en cuestion. 

ABOGADO A CONFIRMA

Un rato despues, noticiacla.com a haya confirmacion di e abogado di e contra partido, esta Mike de Meza, mr Desiree Croes, cu a sigur 100% cu e la wak e carta di Murray, informando cu e lo actua como e representante di ‘acusado’ (verweerder), den e caso aki Inspector di Impuesto. Segun mr Croes, ta un obligacion pa e abogado contrario informa e partido opuesto ken ta bira e abogado. Pa loke ta Murray, e ta informa cu debi na compromisonan previo den exterior, e no por ta presente personalmente den corte, pero a pidi permiso pa haci esaki via ‘videoconference’, y pa manda e link pa esaki. E abogado a confirma cu e la haya un serie di pregunta pa contesta di e huez cu ta trata e caso, y cu e lo contesta esaki na tempo. 

POLITICA

Loke ta sosode ta cu e asunto a bira uno politico, segun e ex mandatario, unda cu kier tira e minister di finanza bou di bus pa a busca Murray. “Tur hende ta liber pa scohe su abogado!. Esey ta nos democracia!” sr Bermudez a sigui bisa. E ta recorda cu e mes tabata inspector di belassting 40 aña pasa y cu e la biaha bay Hulanda busca ayudo di un profesor, pa bringa un caso fiscal contra Lago e tempo ey, y no tabatin mester di permiso di ningun minister, pero mester a djis informa nan di e acto. Sr Bermudez na dos occasion a fungi como minister na Aruba di cual uno tabata como minister di finanza den gabinete Mike Eman II.