AHATA a ofrece e tayer “A Guide to Responsible Procurement” na su miembronan

ORANJESTAD — Aruba Hotel & Tourism Association (AHATA), via su Comite di Medio Ambiente, a organisa tayernan dinamico y interactivo pa sigui empodera lidernan den e sector di hospitalidad cu mas conocemento den practica responsabel ora di cumpra material y producto.  

E sesionnan tabata dirigi pa Juliet Carvalhal, e motor patras di Impact Blue y un di e experto di Aruba den ley di plastic. Participantenan tabata consisti di representantenan di departamento di  compra, financia, operacion, y director di diferente compania miembro di AHATA. Den cada sesion a ser combina presentacion, wega educativo y intercambio di ideanan. Participantenan a haya herment practico pa implementa y keda desaroya nan sistema di procurement responsabel, y pa tin mas conocemento tocante regulacion local.

Un elemento clave tabata e lansamento di un toolkit desaroya pa Impact Blue specialmente pa e tayer. E toolkit ta inclui guia riba materialnan suplente y varios  recomendación. 

E panel informativo tabata dirigi pa  Crescenzia Biemans, Chief Corporate Officer na Bucuti & Tara Beach Resort. Vanessa Rasmussen, lider di AHATA su Comite di Medio Ambiente, a expresa satisfaccion pa e interes sincero di tur participante. 

E tayernan, cual a tuma lugar na Eagle Aruba Resort, ta un paso mas pa empodera e sector turistico di Aruba representa un modelo sostenibel y resiliente.