Temporada di horcan di 2025 por cuminsa prome cu tempo!

MIAMI - Pronosticadonan di tempo di AccuWeather ta adverti cu e prome tormenta tropical di aña por desaroya for di mitar di mei, simannan prome cu e inicio oficial di e temporada di horcan atlantico 2025. Aunke temporada di horcan no ta cuminsa oficialmente te cu 1 di juni, e formacion potencial di e Gyre Centro Americano cerca di Centro America por causa actividad trempan. E gyre aki “tin biaha por pone e base pa un depresion tropical of tormenta tropical tuma forma,” segun AccuWeather. E potencial pa desaroyo tropical ta existi entre 15-22 di mei, aunke e chensnan di desaroyo ta abou.

KIKO TA UN GYRE?

Un gyre ta un area grandi y debil di presion abou y circulacion ciclonico, of contra di holoshi, cu por forma riba Centro America, AccuWeather a bisa. “Esencialmente e ta un area di tempo amplio, cu ta draai poco poco, hopi biaha asocia cu e desaroyo di sistemanan tropical. “Mientras ku e gyre di Centro America mes no ta bira un horcan tipicamente, e por provee ​​e condicionnan pa disturbionan desaroya den deprecionnan tropical, tormentanan, y asta horcannan.”

KIKO TA E PRONOSTICO PA E TEMPORADA DI HORCAN 2025?

Expertonan di horcan di Colorado State University ta pronostica un otro temporada di horcan aktivo den Atlantico, siguiendo pronosticonan similar di AccuWeather luna pasa, cu a pronostica cu 2025 por ta un aña cu “horcannan volatil” similar na esnan cu a mira na 2017 y 2023.

Pronosticonan ta anticipa 13 pa 18 tormenta cu nomber den e cuenca di Atlantico, cu e temporada promedio tipicamente ta producí 14. E temporada por registra entre shete pa 10 horcan y tres pa cinco horcan grandi cu ta alcansa forsa di Categoria 3 of mas halto. E pronostico di aña pasa pa e temporada di horcan di Atlantico 2024 a adverti di un aña sumamente activo, pronosticando te cu 24 tormenta nombra, pero e temporada a caba solamente un poco riba promedio, similar na e proyecionnan di e aña aki.