Na Corsou ta sugeri pa traha camber pa Parlamentarionan por drumi!

WILLEMSTAD - Durante di su trabounan e komishon temporal edifisio di parlamento a risibí remarkenan di parlamentarionan pa pensa riba un espasio den e edifisio di parlamento pa parlamentarionan i personal di griffie por sosegá nan kurpa. Asina presidente di e komishon temporal, Juniel Carolina (MFK), ta bisa. E komishon a haña e tarea pa presentá ku alternativanan kon por pone tur operashon di parlamento bou di un solo dak. Aktualmente parlamento i griffie ta usa 4 diferente edifisio.

Segun Carolina, awor kaba ta nota ku ora reunion dura largu, den oranan di mardugá, ta topa ku parlamentarionan drumí den stul den kambernan patras. Esaki na su opinion no por. P’esei e ta kere ku ta bon pa ora ta traha pa yega na un edifisio nobo pa parlamento ku ta para ketu na sugerensianan ku ta bini dilanti manera konstrukshon di kamber(nan) kaminda parlamentarionan i personal di griffie por drumi.

Carolina a sigui bisa ku asina tin mas remarke ku e komishon temporal a risibí. “Apesar ku e remarkenan aki ta zona manera kosnan ku no ta na nodi, teniendo kuenta ku desaroyonan nobo i eksigensianan ku tin pa un edifisio nobo pa parlamento, mi ta kere ku ta kosnan ku mester para ketu na dje i wak si por implementá esakinan òf laga.” Mas aleu, Carolina a bisa ku den e plannan pa un otro edifisio a tene kuenta ku durabilidat i medio ambiente.

Miembro di parlamento Independiente, Zita Jesus-Leito ku tambe ta miembro di e komishon temporal, a bisa ku e punto di resiklahe ta algu ku parlamento den futuro mester para ketu na dje. El a mustra ku parlamentarionan Gwendell Mercelina (PNP) i Ana Maria Pauletta (PAR) semper a tuma inisiativanan di resiklahe i redusí uso di entre otro plèstik. NOTA: Texto ta scirbi den papiamento fonetico di Corsou.