DVG: A confisca container di webo daña

ORANJESTAD  – Departamento di Salud a confisca un container di webo daña diaranson mainta. Despues cu awe mainta un tip valioso a keda entrega na Departamento di Salud Publico, e inspector di seccion Warenkeuring en Hygiëne di DVG a sali pa haci inspeccion riba un container di webo cu segun informacion ta contene webo daña. Curiosamente esaki ta sosode riba mesun dia cu gobierno a anuncia cu ta cuminsa importa webo for di Colombia. 

CONFISCA 

A resulta cu e tip cu DVG a ricibi tawata uno veridico. E container cu DVG su inspector a logra topa cu ne enberdad tawata contene webo cu lamentablemente tawata daña. DVG mesora a pone beslag riba e container y a duna instruccion pa esaki wordo destrui.

No ta conoci pa DVG cuanto webo daña por a subi mercado prome cu awe 7 di mei, pa cual motibo ta informa y alerta comunidad pa ta conciente na momento di cumpra y/of come webo. 

Por detecta un webo daña door di:

•         Buta esaki den un glas cu awa, si e webo flota ta indicacion cu e webo no ta bon.

•         Holor, webo daña ta hole stinki.

•         Textura, si na momento di habri e webo eta hopi awa of tin descoloracion eno ta bon.