AVB: No obstante suspension di e presidente, tur actividad deportivo ta continua normal!

ORANJESTAD – No obstante e hecho cu e presidente di Aruba Voetbal Bond (AVB) a keda suspendi, tur actividad deportivo lo continua normal. Esaki tabata e mensahe principal di e secretario general di e asosacion, Achmed Nunes diamars anochi. 

CONFIRMA SUSPENSION

Manera cu Noticiacla a raporta anteriormente, e asosacion a suspende e presidente Randolf Laclé ‘per direct’, debi na actonan iregular rond di asunto di impuesto di e asosacion. Diamars atardi, e asosacion a manda un comunicado cortico, stipulando cu ‘  AVB kier informa cu den su reunion di bestuur di 5 di mei, Directiva di Arubaanse Voetbal bond a dicidi di pone President Randolf Lacle inactivo pendiente un investigacion’. A pidi pa comunidad keda trankilo ya cu ‘tur actividad deportivo lo continua normal manera programa’ .

E CASO

Manera cu noticiacla a raporta anteriormente, segun un carta den poder di e portal aki, e asosacion a opta pa pone e director riba 'non actief', citando por lo menos 9 punto . Entre nan cu e la faya den traspasa loonbelasting y primanan social na departamento di impuesto.  Como tal, DIMP a manda un carta pa AVB, cu e presidente lo a 'sconde'. Peticion di e directiva pa haya mas informacion a keda nenga pa e presidente segun e carta. Ademas, segun e carta, e presidente na september 2024 lo a informa e directiva cu AVB ta 'altanto' cu e responsabilidad pa cu DIMP, cu no ta corecto, pa cual ta acusa e presidente di falsificacion di firma (valsheid in geschrifte). A base di tur esaki, a opta pa suspende e presidente per direct. E desicion a wordo firma door di e vice presidente y secretario general. Segun e vice presidente di AVB, den curso di awe, lo tin un comunicado di prensa riba e tema aki. A inicia tambe un investigacion interno pa haya sa exactamente kico por a pasa. 

FACEBOOK

Mientrastanto sr Lacle, dialuna anochi mes, a pone un ‘post’ riba su pagina di Facebook, cu tambe ta bisa algo. ‘No hay almohada mas comoda que una conciencia tranquila’. Cu esaki, por interpreta esaki cu e ta sigura cu e ta drumi cu un consenshi limpi. E dicho aki ta wordo usa hopi biaha ora cu e persona en cuestion no tin nada di teme y cu e ta sigura cu e no a haci ‘nada malo’.