BCA: E Indice di Confiansa di Consumidor a baha den e di cuater trimester di 2024

ORANJESTAD - E Indice di Confiansa di Consumidor a baha den e di cuater trimester di 2024, ya consumidornan ta indica cu por cumpra menos cu nan entrada compara cu 6 luna pasa. Banco Central di Aruba (BCA) a conclui e Encuesta di Confiansa di Consumidor pa e di cuater trimester di 2024. E encuesta di confiansa di consumidor ta evalua e percepcion economico di e consumidor local. Consumidornan tabata mas pesimista, mirando cu e Indice di Confiansa di Consumidor a baha cu 0,5 punto di indice te na 94,2 den e di cuater trimester di 2024  

E Indice di e Situacion Actual a baha cu 0,5 punto di indice te na 94,0 den e di cuater trimester di 2024. Mientrastanto, tanto e Indice di Expectativa como e Indice di Habito di Consumidor a baha cu 0,6 punto di indice te na 94,9 y 0,3 punto di indice te na 94,6, respectivamente, den e di cuater trimester di 2024. Esaki ta indica cu den e di cuater trimester di 2024 consumidornan ainda ta cauteloso encuanto nan habito di compra y fiansa. Tambe, e Indice di Expectativa di Prijs a subi cu 0,3 punto di indice di 90,4 den e di tercer trimester di 2024 te na 90,7 den e di cuater trimester di 2024.

Respondentenan cu a indica cu nan por “cumpra menos cu nan entrada compara cu 6 luna pasa” a keda igual na 90% den e di cuater trimester di 2024. Pa cu e respondentenan cu a expresa cu nan ta spaar menos, esaki a crese te na 43% den e di cuater trimester di 2024. Prijsnan mas halto den e proximo 6 lunanan ainda ta keda un preocupacion grandi pa e respondentenan, apesar di un bahada di 6,0 punto di indice te na 82% den e di cuater trimester di 2024. 

E relato completo di e Encuesta di Confiansa di Consumidor ta disponibel ariba website di BCA www.cbaruba.org