Parlamentario cu varios pregunta na minister riba retiro di hunta di comisario di aeropuerto

ORANJESTAD – Parlamentario Dangiu Oduber a manda un lista largo di pregunta pa minister Wendrick Cicilia riba e retiro di e hunta di comisario di aeropuerto. “Nos por a tuma nota cu Minister Cicilia ta firma un acuerdo cu Royal Schiphol Group pa nombra un CEO Hulandes y asina kita oportunidad di nos Rubiano, nos profesional, esun cu conoce nos isla, nos cultura, y sa kico ta come y bebe di turismo. Ora a pensa cu e lo por tin un poco remordimiento di e mal decision aki, ta yega na nos oido cu Sr. Cicilia kier cambia e statuto di AAA N.V. Sr. Cicilia kier introduci un cambio preocupante esta e posibilidad pa nombra un miembro di hunta di Comisario (1) pa un periodo indefini y (2) sin limite di edad. Esaki ta bay directamente contra Good Corporate Governance y ta habri porta pa politisa un entidad cu ta clave pa nos desaroyo economico” Oduber ta cuminsa puntra. 

Segun Oduber, minister Cicilia no ta brinda e hunta ningun tipo di respet y ta hisa benta decision sin a reuni debidamente cu e hunta di directiva. Pues decisionnan crucial ta wordo tuma sin reunion of consulta cu e organo di supervision, algo cu tambe ta contra tur regla di transparencia y bon maneho. Ademas, ta parce cu Minister Cicilia, cu ta un hurista, no a tuma su tempo pa pasa door di e concepto di ley di Corporate Good Governance.  “Mi ta haci un yamada na e Gobierno AVP-Futuro pa brinda transparencia y contesta e preguntanan nos di Fraccion MEP a haci pa preserva integridad y honra codigo di bon gobernacion” e parlamentario ta finalisa bisando.