Analisis: Ta bira minister of no?

Scirbi pa Tito Laclé

Otro siman a habri, y ainda Aruba ta pendiente riba e situacion cu a surgi den gabinete AVP-FUTURO, unda cu ainda ‘falta’ un minister pa keda postula y huramenta, pa carga un cartera cu a wordo crea especificamente pa esaki. Siman pasa, manera cu Noticiacla a raporta, abogado di e candidato pa minister, Mike de Meza a menasa cu hiba Departamento di Impuesto (DIMP) corte, si pa diahuebs santo ultimo no presenta documentonan ‘corecto’ pa sr. de Meza. Noticiacla a raporta cu DIMP mientrastanto a cumpli,  y cu segun abogado di sr. de Meza, lo a bay delibera internamente riba e situacion awor. Casi un siman mas leu, ainda no tin claridad. Mas pio ainda, e gabinete ta actuando manera cu tur cos ta ok, y cu tur cos ta funcionando normal. 

Rumor

Mientras cu tin silencio hermetico, e mesun silencio aki ta laga caminda pa speculacion y rumor. Nos no ta parti di esey. Pero loke si mester haci,  ta cu mester mustra cu e rumornan aki NO ta yuda e causa. Loke nos ta tende, ta di hendenan cerca di e proceso, y como tal, nan grado di veracidad ta hopi halto. Y e informacion ta ‘interesante’, pero alavez preocupante. Informacion entre otro di menasa di ‘bula afo’ di partido y bay cu asiento, ta sigui zona, mientras cu informacion di ‘switch’ di posicion cu otro colega di partido tambe ta zona casi mes frecuente. 

Kico nos sa?

Parlamentario Mike de Meza no a haya un conseho positivo pa bira minister, basa riba su comportacion fiscal. Esaki ta strob’e di bira minister. E parlamentario sinembargo a mustra di ta insisti cu e kier bira minister, y pa esaki, a exihi clarificacion di DIMP. E clarificacion ey a bin. Parti di e clarificacion, aunke e no ta publico, a ser textualmente lesa door di un otro medio di comunicacion. Asina por a compronde cu e no a cambia, sino a keda negativo pa cu comportacion fiscal di sr. de Meza. 

E opcion pa sr. de Meza, ta pa: 1. Keda como parlamentario (ta p’esey el a bay eleccion), y nomina un otro persona di su confiansa como candidato pa minister. 2. Bandona fila di AVP y bay cu su asiento y bira independiente, 3. Tene honor na su mes y retira, y warda su pensioen di minister. Di tur tres opcion, esun 1 y 2 ta mas menciona. De echo, opcion 1, tin menciona di e posibilidad cu e lo por ‘switch’ posicion cu colega di partido Marlon Sneek den calidad di president di Parlamento. Y asina Sneek ta bira minister y de Meza president di Parlamento (mester cuadra esaki cu demas parlamentario pa e wordo eligi si). Opcion number 2, tambe ta hopi menciona. Esaki ta cu si sr. de Meza bandona AVP, su so, e ta ‘meramente’ trece un deuk chikito den e partido, pero no ta afecta e gabinete ya cu e tin suficiente sosten, aunke minimo, pa goberna. Ta menciona cu un of dos colega mas lo kier ‘join’ e y bula afo tambe. Cu e paso ey si, e ta benta gobierno abou. Pero kico kier logra cu esey? Kico ta e consecuencia pa e ambicion di e partido cu e ta forma parti di dje? Bo a benta gobierno abou, y despues kico? Di tur tres opcion, e ta zona como esun menos practico y logico, pero si mire di e banda emocional y sentimental, uno logico. Rabia y frustracion ta pone cu un persona lo kier ‘ranca e plug’, pa asina satisface e sed ey. Practico, e no ta pasobra e no ta logra absolutamente nada ni pa su hendenan ni pa Aruba.

Loke mester sosode, ta cu e liderazgo mester bin dilanti, tuma e toro na su cacho, y dicidi y sigui padilanti. Pueblo merece un trankilidad, un continuacion y seriedad. Tur atencion actual, ta riba e situacion di e persona cu no por bira minister  y tur e consecuencia rond di esaki. Esaki NO ta yuda e pais aki. Nos tin mucho cos importante pa regla y tempo no ta na nos fabor. Ademas, mundo ta mandando señal cu cosnan peligroso y grandi ta pa sosode. Y nos mester ta uni, cla y enfoca pa por enfrenta esaki. No tin tempo pa atende cu cosnan interno cu ta birando externo y ta hayando mas atencion cu mester.