Rodriguez: E casonan di Tuberculosis na KIA ta bou control

ORANJESTAD -   E docter di Korrectie Instituut Aruba (KIA) dr Rodriguez, a sigura diaranson cu e casonan di tuberculosis na KIA ta bou di control.  Segun Rodriguez, na december, algun sintoma respiratorio a presenta na KIA cerca algun detenido manera tos, aunke esaki no tabata un indicacion directo di Tuberculosis. Na januari, ora e sintomanan a persisti y bira mas fuerte, a haci un test PCR di sputum, pa cual a bin resulta cu un detenido a test positivo y durante e luna di februari, dos mas a resulta positivo pa Tuberculosis activo. Un di e prome casonan activo no ta den KIA mas, e ta afor y ta wordo vigila cu su tratamento via nos seccion di malesanan contagioso (Dienst Besmettelijke Ziekten) ta bay debidamente. 

TIN DOS CASO POSITIVO ACTUALMENTE 

Dr. Rodriguez   a splica e situacion actual di e casonan di Tuberculosis na KIA, caminda a constata cu tin 2 detenido cu casonan positivo actualmente y un cantidad di 3 detenido cu ta positivo pa Tuberculosis latent cu tambe ta bou di tratamento profilatico. E cantidad di 8 caso positivo cu PPD test + asintomatico (tur despues di un screening na 'close contact' di casonan index). Pa cu e 'contact onderzoek' haci door di  Seccion di Malesanan Contagioso (Dienst Besmettelijke Ziekten), nos a haci test cu 25 detenido, di cual 8 a resulta positivo pa PPD (11 di april, 2025). E personanan aki no tin problema respiratorio pues nan no tin sintoma. Mas test lo wordo haci e siman aki ainda.

Mesora a activa e protocolnan estableci pa PAHO/WHO y a tuma e medidanan necesario pa cu e mico-bacteria aki.  E detenidonan infecta a wordo isola y a cuminsa nan tratamento debidamente.  Tambe a limita e bishitanan pa e detenidonan y a haci un investigacion di esnan cu a tene contacto cu esnan infecta.  Testnan di PPD a wordo tuma y extra medidanan preventivo a wordo implementa pa para e propagacion.

Na e momento aki, Staff y Personal di KIA ta liber di contagio. Esnan cu tabata den contacto cu e detenidonan infecta ta den observacion y bou guia medico.  E situacion ta bou control, caminda lo sigui monitoria e mico-bacteria aki pa garantisa cu e casonan di e malesa aki no lo aumenta den KIA. Den contexto actual, nos ta keda atento y ta sigui tur e proceduranan vigente pa fortalece e manera di identifika sintomanan na un fase mas trempan.