Chuparkoff: Usa AI como herment si, pero mantene e control di bo trabou

Posted on 04/11/2025 10:44 am AST | Updated on 04/11/2025 10:44 am AST

ORANJESTAD – Mientras cu e fenomeno y herment moderno tecnologico conoci como Inteligencia Artificial ta fabuloso, bo mester por controla esaki y use pero no laga e tuma ‘over’. Esey tabata e mensahe principal di e orador internacional renombra riba e tereno di AI, Dan Chuparkoff durante e Setar Business Event, e evento commercial annual di nos compania di telecomunicacion Setar NV. Basicamente, segun Chuparkoff, haci uso modera di AI, pero sin cu bo ta perde bo originalidad.

E ORADOR

Den un forma chistoso y relaha, Chuparkoff a splica e historia y meta di AI, y tambe e consecuencia cu esaki tin actualmente riba nos tur rond mundo. Un concepto cu a keda presenta den 2022 y cu aworaki basicamente ta tumando mundo over. Pero, e mensahe di e orador, tabata pa ta cauteloso ora di usa AI, y mas aun, evita cu e herment aki ta controla bo trabou. E orador a conta di su backround, y su hamber pa informacion y e interes cu e la desaroya den AI y awor cu tur e informacion acumula, ta biaha rond mundo, educando hende riba AI, splicando e concepto, su beneficio y tambe su peliger.

FACILIDAD

AI ta facilita bo bida grandemente, y te cierto forma, por bin reemplasa hopi cupo di trabou, ya cu e ta haci trabou di varios hende pareu, y mas importante, den un forma hopi mas liher y facil. Su uso ta increibel y practicamente ilimita. Mester usa esaki, pa p.e. haci investigacionan, comunica mas miho, y acelera cierto procesonan di trabou. E tecnologia cu AI ta usa, segun e orador, ta pone cu tur e tres puntonan menciona, por wordo haci mucho mas liher y ta libera bo cu awor bo por usa bo tempo pa resolve problema y tuma decision mas liher.

PROBLEMA CU AI

Usando un ehempel di un caso den corte na Merca, Chuparkoff, a splica cu AI por perhudica bo tambe, si bo use incorecto. E caso ta uno unda cu un abogado, bringando un caso, a pidi AI pa yude acumula casonan similar di den pasado. Asina e la evita su mes di bay busca tur e informacion ey cu ta tuma hopi tempo. Sinembargo, e loke cu AI a haci, ta busca riba tur Plataforma, casonan legal, y a bin cu 5 caso. Loke cu AI no por a distingui, ta si e casonan tabata real, storia, ficcion usa pa pelicula of un otro situacion. E huez tratando e caso, a puntra e abogado, si e casonan cu e la referi na dje (busca cu ayudo di AI), tabata real. A resulta cu AI a djis coi casonan cu tabata disponible riba internet, cu consecuencia cu e caso a bay hopi malo pa e abogado. E problema segun Chuparkoff, ta cu AI ta usa informacion cu tin acumula, pero no por verifica si esaki ta real of no. Ademas, e no por check futuro. Pues, ta bon pa abo tin control di dje, y depende con bo ta usa esaki, y pa bo usa AI, pero keda den control pa abo mes formula bo cosnan, y simplemente usa AI como un ayudo.

E la compara e uso di AI como un stagaire, esta un persona cu ta traha pabo, y cu bo tin cu controla regularmente y adapta su contenido, y no tuma esaki sin mas. Esnan cu ta considera AI como un co-piloto, e no ta considera corecto. Un presentacion sigur interesante pa tur presente.

Iberostar Beachfront Resorts a presenta su Shoco Boulevard
ORANJESTAD – JOIA Aruba by Iberostar dialuna a anuncia su sosten na e plan visionario "Plan Nacional Conservacion di Shoco di Aruba Birdlife Conservation" (ABC) cu e inauguracion di Shoco Boulevard. Shoco Boulevard ta un coredor pa bida silvestre, crea pa proteha e simbolo nacional stima di Aruba, e Shoco (Athene Cunicularia Arubensis). Como parti di e logro aki, Iberostar a firma oficialmente e acuerdo di "Shoco Community Conservation" cu ABC, reforzando e compromiso pa proteha e Shoco y sostene e esfuerso nacional di conservacion. E iniciativa aki ta un contribucion directo na e liderato di ABC pa conserva y asina subraya e compromiso di Iberostar pa duna sosten na esfuerso local, invertiendo den biodiversidad nacional y na mes momento respetando experticio local. Shoco Boulevard di JOIA Aruba cuidadosamente a construi buraconan artificial (neishi di Shoco) memey di flora nativo manera cawara, pal'i sia, wayaca, kibrahacha, fofoti, aloe, cadushi y bushi. Ya cu shoco ta evita areanan denso unda tin palonan halto y matanan ornamental, e escogencia pa uza matanan nativo ta garantisa cu e shoconan tin un espacio sigur y natural unda nan por biba trankil y prospera. E coredor aki ta diseña y dedica exclusivamente pa e shoconan. Aki nan tin un espacio proteha pa biba, reproduci y move liber sin wordo molestia. Tur hende por observa e shoconan, respetuosamente for di un distancia, loke ta permiti e magnifico parhanan aki florece den un entorno natural. Na mes momento, esaki ta promove aprecio y conscientisacion pa e biodiversidad unico di Aruba. E iniciativa aki hamas por a keda realisa sin e cuadro di conservacion importante di Aruba Birdlife Conservation (ABC) y Iberostar ta sinti su mes honra pa ofrece su aporte, recurso y espacio pa dicho causa. E proyecto aki ta un extension di e Shoco Sanctuary establici na Tierra del Sol Golf Course pa Iberostar na december 2024, unda e prome neishi articifial a keda introduci ya caba na 2019. Desde december 2024, e initiativa a crece cu un total di 32 buraco artificial (20% di e populacion di Shoco). E Shoco Boulevard awor ta representa e segundo fase di e plan ABC, pa desaroya un Comunidad di Shoco extenso pa medio di coredornan natural pa facilita e shoconan traha neishi y move tur rond nos isla. Demostrando e compromiso di Iberostar pa cu iniciativanan local y manteniendo estrictamente na e recomendacionnan di ABC, e proyecto Shoco Boulevard por a realisa conservacion di e instalacionnan di JOIA Aruba. Asina a crea un habitat sigur pa e poblacion di shoco y brindando tanto na turista y local un experencia rico, interactuando cu nan entorno natural. E proposito di e espacionan aki ta pa ofrece areanan mas safe pa e shoconan por broei y apoya metanan mas amplio di biodiversidad, yudando preserva e ecosistema unico di Aruba y garantisa un entorno natural cu ta keda pa futuro generacionnan. Den curason di e proyecto aki tin un storia special: Shon Shoco Pirata, un shoco resistente cu a haci JOIA Aruba by Iberostar, su hogar. Na 2022, auto a dal Shon Shoco Pirata cerca di su neishi na rand di caminda. Despues di casi un aña di rehabilitacion na man di un veterinario dedica, el a triunfa y bolbe bek na su zona preferi. Inspira pa su perseverancia, e team di JOIA, bou direccion di ABC, a haya un luga mas safe p'e y pa futuro generacionnan di Shoco. Asina a nace e Shoco Boulevard, un coredor den cual nan por traha nan neishi di forma safe y cu tur comodidad di e poblacion di Shoco. Awe, por reconoce Shon Shoco Pirata facilmente, pa su unico wowo cu e tin, simbolisando resistencia y speransa pa e esfuersonan di conservacion di e bida silvestre na Aruba. Dentro di e movimento global di sostenibilidad di Iberostar, e iniciativa "Wave of Change", ta refleha e creencia central di Iberostar cu e impacto real ta wordo produci pa medio di mehoracion di e experiencia local, respet pa naturalesa y socionan confiabel. Shoco Boulevard a keda oficialmente presenta durante un evento emotivo riba diadomingo 27 di april 2025, unda lidernan gubernamental, incluso minister di Finansa y Asuntonan Economico, Geoffrey Wever, ministro di Husticia, Integracion y Transporte Publico, Arthur Dowers, y miembro di Parlamento y Presidente di comision di Turismo, Jennifer J. Arends-Reyes— a reuni pa celebra y reconoce e importancia di proteha e tesoronan natural di Aruba. Durante e evento, e ministronan a cera conocí tambe cu Aula di Lama, e centro educativo nobo di JOIA Aruba, diseña pa inspira y educa mucha, ONG y scolnan riba e biodiversidad rico di nos isla mediante experencia interactivo. Aula di Lama, un aula educativo di e Ola di Cambio, ta un espacio multifuncional y participativo disponibel pa scolnan local y ONG, dedica pa studia y explora temanan relaciona cu sostenibilidad na Aruba. E localidad inovador aki ta ofrece un oportunidad unico pa participa den actividadnan di investigacion y educacion dirigi riba e importancia di ecosistemanan terestre, marino y di costa. Apoyando e Plan Nacional di Conservacion di e Shoco di ABC, Iberostar tin como obhetivo pa amplia esfuersonan di ABC pa crea concientisacion pa e necesidad pa proteha e especienan aki. Pa medio di dicho apoyo, Iberostar ta invita tambe otro entidadnan den e industria turistico di Aruba, pa cuminsa cu iniciativanan similar, fomentando e creacion di e coredornan di conservacion adicional rond e isla y reforsa asina un movecion colectivo pa un futuro mas sostenibel pa e ambiente natural y unico di Aruba. Tocante Iberostar Hotel & Resorts: "Iberostar Hotels & Resorts" ta e division di hotel cu ta forma e negoshi principal di Grupo Iberostar, un multinacional di Spaña, 100% familiar cu casi 70 aña di historia den sector turistico, cu origen empresarial cu ta bay te 1877. Su portfolio ta inclui 31.500 camber den 100 hotel di cuatro y cinco strea den 13 pais, dedica na ofrece un calidad excepcional y un servicio sincero. Na mes momento nan ta defende e modelo di turismo responsabel cu tin como prioridad, bienestar tanto di e hende como di naturalesa. Cu 2,5 miyon bishitante pa aña y un presencia privilegia den prome liña di beach, e marca Iberostar Beachfront Resorts ta ofrece tres segmento distinto pa cumpli cu e soño di vacacion di cada turista. Iberostar Waves ta ofrece experencianan yen di diversion, perfecto pa famia y pareha, amante di lama. Iberostar Selection ta ofrece estadianan premium, espacioso y relahante cu un servicio excepcional. Por ultimo, JOIA by Iberostar ta un coleccion di resort di luho na lugarnan exclusivo, cu ta distingui nan mes pa un servicio altamente personalisa y sofestica.
Mas Local
Lesa Mas
Director di SETAR, Roland Croes ta invitado di Noticiacla LIVE awe nochi
ORANJESTAD – E director di e compania di telecomunicacion SETAR, ing Roland Croes, ta invitado di e programa Noticiacla LIVE awe diamars anochi. Durante e programa, e moderador Tito Laclé lo atende varios tema actual di telecomunicacion cu e hefe di SETAR. Temanan manera 5G, calidad di internet na Aruba, inteligencia artificial, y mucho mas. No perde e programa aki cu lo ta enbibo cuminsando pa 8:30pm riba e pagina di Facebook di noticiacla.
Mas Local
Lesa Mas
Varadero Aruba Acquires Largest Hydraulic Boat Lift Trailer in the ABC Islands
(ADVERTORIAL)
Mas Local
Lesa Mas
Kloknan di misa catolico na Aruba a zona diabierna merdia na honor di Papa Francisco
STA CRUZ – Na honor di Papa Francisco (dfm), tur klok di misa catolico diabierna merdia 12’or a bati. Alavez a pone bandera halfstok tambe. E decision pa esaki a keda tuma dialuna despues cu e Papa a fayece. E sumo pontifice ta wordo dera diasabra mainta 10'or ora di vaticano.
Mas Local
Lesa Mas
E aña aki 19 ciudadano di Aruba lo haya Condecoracion Real
ORANJESTAD - E aña aki lo condecora 19 ciudadanonan di Aruba. E ‘Lintjesregen’ na Aruba lo tuma luga awe. Lo condecora e siguiente personanan como ‘Lid in de Orde van Oranje-Nassau’:
Mas Local
Lesa Mas
E legendario cantante Jossy Brokke jr a bay sosega
ORANJESTAD –Diahuebs atardi a drenta e tristo noticia cu e conocido baluarte y legendario musico y cantante local Jossy Brokke jr a bay sosega. E tabata malo basta tempo. Noticiacla ta manda palabra di condolencia na su famianan. Cu Jossy sosega na paz. Noticia den proceso.
Mas Local
Lesa Mas