Fraccion di PPA cu mas di 10 pregunta pa minister Wever riba guera di tarifa di Merca

ORANJESTAD – Fraccion di PPA den Parlamento a manda un carta cu mas di 10 pregunta (15 pregunta pa ta exacto) na minister Geoffrey Wever, den su calidad como minister di Finanza, Economia y Sector Primario, riba e situacion cu a surgi mundialmente awor cu presidente di Merca Donald Trump a inicia un guera di tarifa mundial. Y con esaki ta bay afecta Aruba. Ademas, den un articulo e ta señala alarmanan di varios instancia local como internacional, atendiendo e situacion. Teniendo na cuenta esaki, Fraccion di PPA a haya necesario pa manda un di dos carta pa Minister di Economia y otro ministernan pa puntra kico ta loke Aruba ta haciendo na e momentonan aki pa prepara mirando cu tur experto, local y internacional, ta expresando nan preocupacion.Mas ainda si tene na cuenta cu 95% di nos productonan ta wordo importa for di Merca of di China cu ta pasa via Merca.

Oduber ta compronde cu e gobierno a caba di subi, pero na mes momento e ta expresa cu for di añanan atras caba tur hende sa cu e sistema di BBO ta funesto pa nos comunidad y atrobe nos ta haya nos mes confronta cu un crisis mundial caminda cu prijsnan ta bay subi cu porcentahenan haltisimo for di diferente mercado cu Aruba ta importa for di nan. Riba dje nos hendenan tin cu bay paga un BBO acumulativo.

 OPCION

Un opcion presenta pa Oduber ta e importacion di productonan for di e region mes. Tur partido a papia di busca comestibles, productonan for di region, manera por ehempel, Colombia caminda hopi di nos ciudadanonan ta biaha, pakico no importa for di e pais aki cu lo significa prijsnan di 25, 30 y hasta 35% mas barata pa productonan manera galiña, carni y otronan. Loke gobierno mester haci ta, ni sikiera pasa un ley, sino un decreto y asina mustra e curashi y dicidi cu como gobierno ta habri e mercado. Oduber ta bisa cu tin diferente compania interesa pa cuminsa importa for di Colombia y hasta di Costa Rica. “Nos mester habri mercado pa reduci e gasto di consumo di nos hendenan aki na Aruba. E efecto di guera di tarifa cu tin na e momentonan ta cu prijsnan ta bay subi y ta bay subi drasticamente”. Click AKI pa lesa e carta manda pa e minister.