Benschop: Negosacion entre gobierno y RSG por dicidi proximo CEO pa aeropuerto

ORANJESTAD – E actual COO (Corporate Operations Officer) di Aruba Airport Authority NV, Jürgen Benschop, no kier a bisa ni no si e ta interesa pa bira e proximo CEO di Aeropuerto Reina Beatrix. E ta warda negosacionan entre gobierno nobo di Aruba y e grupo hulandes Royal Schiphol Group (RSG), pa wak kico ta sali afo. Den e programa NoticiaCla LIVE diamars anochi, e la duna su comentario riba e tema ‘cayente’ cu ta envolvi e proceso di Royal Schiphol Group (RSG) cu awor tin chens di bandona aeropuerto na juni proximo. Na juli aña pasa e CEO pa RSG cu tabata na cabez di aeropuerto, Joost Meijs, a bandona su function, pa despues na augustus, tres Rubiano tuma over como ‘interim management team’. Berdad ta cu ta un secreto publico cu Benschop ta esun mas mira pa hopi aña caba como   esun mas logico pa tuma over como Rubiano. E ta COO pa hopi tempo caba, y ta conoci cu e ta ambiciona pa e funccion, pero manera e mes ta bisa, e mester ta husto y transparente pero, no a yega asina leu pa ‘confirma’ si e kier e funcion.  

 DOCUMENTA E TRABOU DI RSG

Segun Benschop, nan a haci un ‘assessment’ di e ultimo 20 aña cu Schiphol Group a dirigi aeropuerto. E COO ta bisa cu tabatin bon temporada pero tambe temporada menos bon. E assessment a mustra kico ta e beneficio y e cosnan menos bon y a duna gobierno pa nan consideracion. Actualmente e gobierno nobo tin intencion pa negosha bek cu RSG despues cu e gabinete anterior a stop esey. “Nos ta open pa anything” Benschop a bisa, mustrando mes momento cu e team di Aruba ta bezig ta maneha un proyecto grandisimo. Cu nos por hacie nos so, si. Cu nos mester di ayudo porta di un professional, why not” Benschop a bisa abiertamente den e programa. E ta admiti cu e team local ta hacienda un excelente trabou. 

BENSCHOP TA INTERESA?

E pregunta cu si e ta interesa (ainda), ta un pregunta cu tur hende ta haciele e dianan aki. Ora cu e moderador Tito Laclé a puntre directamente si e ta interesa, e la contesta cu e trabou ta loke e la studia p’e. “Pero e mester ta algo cu ta transparente y cu tur hende ta para su tras” e la cuminsa na bisa. “Mi no ta bisa si ni no. Mi ta gewoon sigui cu e proceso y mi ta kere cu tanten cu nos tey y nos tin un team pa por yuda, semper mi ta open pa esey”. 

PROBLEMA CU LNT

Loke tambe Benschop a mustra, ta cu e problema actual ta e structural salarial y e problema cu tin cu e ley cu ta regula salario halto di ehecutivonan di compania. E ley conoci como Landsverordening Normering Salariering (LNT), cu tambe ta aplica pa aeropuerto, ya cu nan tambe ta un NV 100% di gobierno. Esey ta pone cu e ta ‘manca’ e posicion salarial bastante y ta hacie dificil pa por atrae un persona capaz na e funccion, vooral di exterior. “Esey ta limita hopi compania na Aruba pa keda of haya profesionalnan aki nan den funcionan cardinal” Benschop a sigui bisa. E ley, segun Benschop, ta pone limitacion no solamente pa e CEO pero tambe pa tur top funcionario, incluyendo su funccion di COO y otronan. “Kier meen nos ta echt wardando e gobierno nobo, wak ki decision ta wordo tuma, referente esaki y wak con nos ta sigui pa dilanti cu esey” Benschop a bisa.