Gino Brownbill ta bira e proximo Presidente di Parlamento na Corsou

WILLEMSTAD .- Fergino Brownbill lo ta e próksimo presidente di Parlamento di Kòrsou, Ramon Yung komo vise-presidente i David Seferina lo bira e lider di frakshon di MFK. Esei EXTRA por a komprendé for di kontaktonan ofisial den e partido. T’asina ku den e fin di siman ku a pasa tabatin tur sorto di rumor ta kore rònt, tur klase di spekulashon. Pero komo medio responsabel manera EXTRA ta di semper, nos a drenta den kontakto ku presidente dje partido, sr. Sithree “Cey” van Heydoorn. Di un banda el a bari algun dje rumornan fo’i mesa,  di otro banda deklará kiko si ta bai sosodé.

Sr. van Heydoorn a duna di konosé ku Brownbill lo bira e próksimo presidente di Parlamento, miéntras ku sr. Yung ta asumí e funshon suplente komo vise-presidente. David Seferina ta bira e lider di frakshon, kual ta e funshon ku a ser okupá pa sr. Gilbert Doran.

Tambe EXTRA a splika sr. van Heydoorn ku tabatin rumornan insistente mustrando riba e empresario, sr. Hubert Raper, komo e posibel titular pa asumí e kartera di Desaroyo Ekonómiko i Turismo (MEO) pero sr. van Heydoorn a nenga esei. Es mas, e propio sr. Raper a desmentí esei.

Si mester tuma nota di e moveshonnan aki den seno di MFK, por ta bien posibel ku dje forma akí ta traha kaminda pa sra. Charetti America-Francisca bai asumí un puesto den Minister den e próksimo gobièrnu. Sra. America-Francisca a hasi e trabou na satisfakshon i kisas e den konsulta ku partido lo ta duna preferensia pa otro desafionan, den e kaso akí den un funshon ehekutivo. NOTA: Texto ta scirbi den Papiamento fonetico di Corsou.