LaSorte (AHATA): Maneho di Trump causando caida den bookings pa Aruba pa di dos parti di aña

ORANJESTAD – Tin indicacion, segun CEO di AHATA sra Tisa LaSorte, di rebaho di turista den e di segundo parti di aña. Esaki como efecto riba e medidanan cu presidente Donald Trump ta anunciando aworaki. Tabata durante e programa Noticiacla LIVE diahuebs anochi, cu LaSorte a atende e tema, riba pregunta di moderador di e programa Tito Laclé. Manera ta conoci, Trump a impone varios medida di tarifa contra paisnan rond mundo, cu consecuentemente ta haci bida mas caro, tanto pa e MEricano y e stranhero cu ta haci negoshi cu Merca. A base di esey, a puntra LaSorte con esaki por afecta e industria turistico di Aruba. 

E EFECTO

“Tin algun indicacion caba, hopi trempan si ainda, AHATA ta acumulando tur e cifranan pa ta sigur pa wak kico e proyeccion nobo ta. Pero tin algun indicacion caba cu nos ta hayando cu nan ta mira, loke nos ta yama ora cu nos ta mira padilanti, dus e segundo parti di aña, cu nan ta mira caba loke nos ta yama un softening. Pues un rebaho un tiki di e cantidad di bookings cu ta ricibi”. Esey segun LaSorte, ta un indicacion trempan. 

MENOS TURISTA

Loke esaki ta nifica, ta cu tin menos turista biniendo Aruba for di Merca, den e di dos parti di aña. E turista, mirando e situacion dudoso financiero, ta scohe pa bay vacantie menos, pasa menos dia, biaha distancia menos largo y gasta menos y bay lugarnan mas ‘barata’. Y cu esaki tambe Aruba ta keda afecta, ya cu Aruba ta un destinacion mas leu y mas caro tambe. 

ARUBA TABATIN UN BON PROME PARTI

E la mustra mesora tambe si cu e prome parti di aña, cos tabata mustra bon. Tabatin un temporada fuerte. Pero loke ta mira awor, ta un slowdown den e bookings pa e di dos mitar di aña. “E ta un tiki preocupante, pero mester warda”, LaSorte a sigui bisa.