Secretario di estado Szabó ta bishita Aruba otro siman

ORANJESTAD – Riba dia 8 di april secretario di estado Hulandes Zsolt Szabó lo bishita Aruba. E bishita di trabou ta den cuadro di sera conoci cu e gobierno nobo di Aruba,  y hiba combersacionnan tocante e temanan bon gobernacion y accion. E mandatario lo bishita Corsou despues. 

ARUBA

E bishita di trabou ta inicia riba diamars 8 april na Aruba. Szabó ta topa cu entre otro e ministernan di e gabinete nobo, bou di guia di Mike Eman, cu recientemente a tuma asiento. Banda di un combersacion cu e team di minister nobo, e minister Hulandes ta papia cu miembronan di parlamento di Aruba. 

E bishita na Aruba ta den cuadro tambe di bon gobernacion. Asina señor Szabo lo atende un charla di Mieke Droog, director di programa di e instituto Arubiano pa gobernacion y liderazgo na Universidad di Aruba. Na e campus e ta participa na un sesion di pregunta interactivo cu studiantenan. 

Para economicamente riba propio pia ta, banda di bon gobernacion y finansa solido, un di e puntonan di lansa di Szabó. P’esey e ta haci apertura di e sucursal nobo di e compania di instalacion tecnico Pro-Tec na Aruba. Recientemente e compania a ser cumpra pa e compania Hulandes Van Dorp y ta specialisa den friamento di edificionan haciendo uzo di awa di lama.