Grupo selecta di prensa a conoce e US-bound departure hall nobo y di maleta di aeropuerto

ORANJESTAD – Un grupo selecta di prensa di Aruba tabata invita diamars di aeropuerto di Aruba pa bishita e edificio nobo di checking di e parti pa Merca y e sistema automatisa di maleta. E prome palabra tabata ‘impresionante’. Un edificio completamente nobo, automatisa, unda cu e biahero por haci varios parti di su checking e mes, y cu e sistema di maleta ta asina professional, cu dificilmente bo maleta por perde. Un edificio cu a tuma su tempo pa keda cla, pero cu ta completamente ekipa pa duna Aruba e facilidad mescos cu cualkier destinacion internacional hopi mas grandi cu Aruba, sin ningun problema. E forma con tur cos ta cana, ta hinca den otro, y ta funciona, tabata merece palabra solamente di elogio pa e gerencia di aeropuerto. Di otro banda, lamentablemente, e parti moderno bunita cu a keda presenta, no lo remedia e liñanan largo di pasahero mericano cu por wak tur dia pafo di e edificio. Segun autoridad di aeropuerto a indica corectamente na noticiacla, esey ta pa cuenta di gobierno, unda cu imigracion ta keda un problema, y cu esey ta e causa di e liñanan largo tur dia. Pero aki tambe ta spera cu ora cu tur cos ta cla, cu esey tambe lo por ta un problema di pasado. Pero, pa aworaki, e persona cu biaha pa Merca, cu excepcion di e parti di imigracion local, por conta cu un experiencia super moderno, bunita y profesional. 

E EDIFICIO

E edificio ta drenta den uso oficialmente otro siman diamars, 8 di April, cu algun aeroliña mericano haciendo uso di e facilidad, pa despues mas laat den e luna, otro aeroliñanan mericano tambe drenta. E intencion ta cu pa mei, e edificio ta wordo completamente usa, y cu e edificio actual un banda, no ta wordo usa mas. De echo, intencion ta pa benta e edificio actual abou completo y traha uno completamente nobo. 

GATEWAY 2030

E proyecto a inicia algun aña pasa, pero rapidamente a confronta problema, ora cu pandemia a toca porta di Aruba. No obstante esaki, Aruba su aeropuerto a conoci progreso significante, cu e fase 1A, cla pa drenta den operacion. E terminal nobo pa checkin pa buelonan mericano, e parti di maleta y oficina di aeroliñanan, ta parti di e prome fase. E ta percura pa un proceso y experiencia facil y moderno di checkin di un pasahero pa Merca. 

MALETA

Loke a impresiona tabata e facilidad di maleta, unda cu un carousel monstroso y moderno, por procesa 2000 maleta pa ora, selecta, scan y controla te hasta, y usa e technologia di radiacion, pa evita problema si tin material peligroso y prohibi den maleta. Pa cumpli cu seguridad mericano, e sistema ta asina moderno cu te na ultimo, ora cu e agente di imigracion mericano aproba un pasahero pa biaha, cu e momento ey, e por sigura cu e maleta en cuestion por tambe sigui e proceso y bay riba e avion hunto cu e pasahero. Tanten cu e pasahero no ta aproba pa biaha, e maleta ta keda nechi warda, electronicamente, wardando e autorisacion electronico di e agente di imigracion.

LIMITA PROCESO

Loke e sistema ta logra tambe ta cu e ta elimina por lo menos 3 fase di control cu aworaki e pasahero tin cu pasa aden. E no mester colecta su maleta di nobo despues di checking, y consecuentemente tambe ta elimina cu e tin cu bolbe pone su maleta pa bolbe wordo gescreened, e biaha aki pa douane mericano. 

TEST

E compania Crysalis Global Consulting a acesora e personal di aeropuerto den e periodo di prueba pa sigura cu ora cu e sistema bay ‘live’, cu no tin ningun problema.

SCHEDULE PA AEROLIÑA 

Manera indica, dia 8 di April lo tin un asina yama ‘soft opening’ cu aeroliñanan Delta, United, Southwest, y Spirit. Entrante 29 di April, JetBlue y American Airlines tambe ta join, cu ta nifica cu tur aeroliña lo ta operacional den e edificio nobo na mei.