- Gabinete Pisas a pidi retiro di dos di su ministernan di su gabinete
- Opinion: E post cu tur sa tabata bin: clapchi.
- AZV a lanza logo relaciona cu 25 aña di seguro AZV
- VIDEO: Grupo di prensa local a conoce e restaurant mas nobo ‘Gaia House of Grill’ na JOIA Aruba
- Famia di turista cu a muri tragicamente na Aruba, ta papia, y curpa ta 'pega' na Aruba ainda
Lidernan empresarial Venezolano motiva cu AVP-FUTURO kier habri frontera
CORO - E evaluacion nobo di gabinete AVP-FUTURO riba e reapertura di biahenan aereo entre Venezuela y Aruba a lanta expectativanan halto cerca lidernan empresarial Venezolano, ya cu e conexion aereo directo ta mehora comercio y turismo entre e dos paisnan. Asina e vice presidente di Camara di Comercio di La Vela de Coro, Juan Gotopo a bisa den un declaracion exclusivo pa Noticiacla dialuna.
CURVA DI CRECEMENTO
Segun Gotopo, comercio entre Aruba y Venezuela a mustra un curva di crecemento cuminsando na april 2024, un aña despues di apertura di e frontera marítimo. Historicamente exportacion for di Haf di La Vela na Coro tabata mas tanto pa e isla di Corsou. Sin embargo, for di mei di aña pasá, e tendencia di exportacion for di e haf aki pa Aruba a sigui subi. “ Hasta surpasando exportacion pa isla di Curaçao, cuminsando na october di aña pasa, ora cu a exporta 200 ton di fruta y berdura pa Aruba y solamente 44 ton pa Curaçao” Gotopo a sigui bisa.
Durante e prome kwartaal di 2025, Camara di Comercio y Turismo di La Vela de Coro a registra exportacion di mas o menos 890 ton di cuminda, di cual 72.47% tabata destina pa Aruba y 27.52% pa Curaçao.
Na momento cu reestablece lasonan aereo directo entre Aruba y Venezuela segun Gotopo, esaki lo facilita negoshinan y camaranan di comercio realisa misionnan comercial cu lo amplia y diversifica e suministro di bienes y servicionan, generando asina un mercado competitivo cu un impacto economico cu ta beneficia e consumidornan final.
Tambe e ta bsa cu e reapertura di e ret aereo no solamente lo presenta oportunidadnan di inversion den e sector comercial pero tambe lo atraé invercion den e sector aeronautico di e isla, generando un fluho di pasaheronan Venezolano cu un destinacion final na Noord America of vise versa. Esaki lo genera entrada significante for di impuesto di aeropuerto y tambe atrae empresarionan aeronautico interesa den amplia e oferta di asiento entre e isla y Merca pa cumpli cu e demanda pa e volumen di pasaheronan aki.
Contrali na Aruba, Corsou a habri su fronteranan aereo y maritimo bèk na mei 2023, beneficiando den un grado limita di e fluho di pasaheronan Venezolano. Esaki pasobra, contrario na Aruba, Curaçao no tin su propio aerolinea cu conexion cu Norte America, y Aeropuerto Hato ta keda den Categoria II door di FAA, minando asina e intencionnan di doñonan di negoshi pa establece un aerolinea riba e isla.
Asina tambe conectividad aereo directo lo permiti e Arubianonan regresa na nan mercado natural pa turismo di salud segun Gotopo. “ Den e estado di Falcón, aparte di nos beyesa natural y monumentonan historico y arkeologico, nos tin un amplio gama di servicio di salud y profesionalnan, y tambe e dunadonan di servisio di turismo, entusiasma pa yama bo bonbiní cu brasa habrí y duna e miho atencion na e mercado aki cu den añanan anterior a scohe e ciudadnan di Coro, La Vela y Punto Fijo como e destinacion prefer pa cuido medico a duna nan atraccionnan, economia y proximidad”, Gotopo a sigi bisa.
“P’esey nos ta spera cu e gabinete nobo di AVP-Futuro, na kende nos ta desea e mayor exito den su administracion, hunto cu autoridadnan Venezolano, yega na un pronto acuerdo pa restaura e necesidad urgente di conectividad aereo entre e dos paisnan” e vice presidente a finalisa bisando.
Venezuela ta fortalece alianza di seguridad cu Hulanda pa motibo di agresion
CARACAS - Canciyer di Venezuela, Yván Gil, a tene un reuni strategico diasabra 10 di januari cu e encargada di relacion comercial di Hulanda, Carmen Gonsalves. Durante e encuentro, e dos diplomatico a reafirma valides di acuerdonan pa combati narcotrafico y delito transnacional den Caribe. E alianza aki ta busca garantiza seguridad y vigilancia comparti den zonanan fronteriso cu isla Aruba, Corsou y Boneiru. Durante e cita, Gil a presenta un denuncia formal tocante e atake militar americano di 3 di januari, calificando esaki como violacion di Carta di ONU. E canciyer a bisa cu agresion a viola inmunidad di presidente Nicolas Maduro y di prome combatiente Cilia Flores. E la recorda tambe cu e acto ilegal a laga cien persona morto, tanto civil como militar, cu tabata defende soberania nacional.
Embahada di Merca na Venezuela ta bisa su ciudadanonan: Sali di pais “awor mes”
CARACAS – Embahada di Merca na Venezuela ta conseha tur ciudadano mericano cu ta den pais cu mester sali “awor mes”, y cu mester tuma precaucion y wak rond nan te ora nan logra sali. E advertencia, cu a cuminsa dia 6 di januari ultimo, ta recorda cu Venezuela tin e nivel di advertencia mas halto di Departamento di Estado —
Venezuela a decreta ‘Estado di Conmocion Exterior’ y a activa plannan di defensa
CARACAS – Noticia confirma cu Noticiacla a ricibi oficialmente, ta bisa cu ‘e presidente di Venezuela, Nicolas Maduro, a decreta awe e estado di Conmocion Exterior na henter territorio nacional, debi na e agresion di Estados Unidos, y a activa e plannan di defensa pa enfrenta e situacion. E disposicion cu a wordo firma y ordena pa e mandatario ta concebi pa proteha e poblacion, garantisa e funcionamiento pleno di e institucionnan republicano y pasa di inmediato na lucha armada. Na Venezuela sinembargo, ciudadanonan ta papia di 'toque de queda', y no un estado di conmocion'.
Rodriguez: Venezuela ta rechasa y denuncia agresion militar
CARACAS – “E Republica Bolivariano di Venezuela ta rechasa, repudia y ta denuncia dilanti di comunidad internacional e agresion militar hopi grave cometi pa e gobierno actual di Estados Unidos di America contra territorio y poblacion Venezolano den localidatnan civil y militar di ciudad Caracas, capital di e Republica, y den e estadonan Miranda, Aragua y La Guaira”. Esaki tabata e prome reaccion di gobierno venezolano diasabra mainta riba e atake mericano. “E acto aki ta constitui un violacion flagrante di e Carta di Naciones Unidas, specialmente di su articulonan 1 y 2, cu ta confirma respeto pa soberania, igualdad huridico entre estadonan y e prohibicion di uso di forsa. Tal agresion ta amenaza pas y estabilidad internacional, concretamente den America Latina y e Caribe, y ta pone na grave riesgo e bida di miyonan di persona.
Aeropuerto di Bonaire ta logra record: Mei miyon pasahero den un aña!
KRALENDIJK - Bonaire International Airport a yega dialuna pa prome biaha den su historia na e punto di 500.000 pasahero den un solo aña. E pasahero en cuestion a yega riba e isla cu un buelo di KLM for di Schiphol, unda nan a ricibi’e cu regalo y bolo. “Yega e limite aki di mei miyon pasahero ta un resultado bunita,” segun Giordano Molina, director operacional di e aeropuerto.
Parlamento Venezolano ta presenta ley contra “pirateria”
CARACAS - Parlamento federal Venezolano, e Asamblea Nacional, a vota unanimamente pa un ley cu por impona te binti aña di prizon contra ken cu ta culpa di pirateria of bloqueo, of cu ta facilita esaki. Ministro di Exterior Yvn Gil a adverti e siman aki, na nomber di presidente Venezolano Nicolas Maduro, e paisnan den region contra loke e la yama creciente “agresion” Mericano. Merca a aumenta su presencia militar den e region considerablemente den e ultimo lunanan, specialmente riba laman. Den un carta di Maduro, e pais a acusa Merca di “pirateria”. Cu esaki ta referi na confiscacionan reciente cu Merca a haci di transporte di petroleo for di y pa Venezuela.
Follow NoticiaCla
