Juan ‘Adi’ Thijsen por lo pronto ta keda minister plenipotenciario na Hulanda

ORANJESTAD – Actual minister plenipotenciario pa Aruba na Hulanda, Juan “Ady” Thijsen, por lo pronto ta keda den su funcion, aunke cu diabierna awor un gabinete di otro signatura ta sinta. Mientras cu diabierna awor, Gobernador ta huramenta 6 minister nobo cu ta forma gabinete AVP-FUTURO, ainda falta un minister y un minister plenipotenciario. E candidato cu falta pa bira minister, a haya dificultad cu screening y ta den e tramite pa ainda keda cla. Mientrastanto tin un candidato plenipotenciario tambe nobo proponi (antes esaki tabata mr Desiree Croes), den persona di drs Rene Herde, su screening awor a cuminsa. Y pesey, tanten cu e screening ey ta tuma lugar, mr Thijsen ta wanta e stul cayente, pendiente e proceso di sr Herde. Unabez e screening keda completa y ta positivo, sr Herde ta muda pa Hulanda y ta nifica final di e periodo di sr Thijsen como minister plenipotenciario. Sr Thijsen a huramenta dia 13 di oktober 2022 como minister Plenipotenciario pa Aruba na Hulanda.