E prome 100 dia di gobierno ta cuminsa conta diabierna awor numa. No prome!

ORANJESTAD – E conteo di e prome 100 dianan di e gobierno nobo ta cuminsa oficialmente diabierna awor, 28 di maart 2025, esta despues cu Gobernador di Aruba huramenta e candidatonan pa minister. Esey ta hiba nos na e fecha di 6 di juli 2025. Si pa e fecha ey, e ‘promesanan’ haci durante e ultimo campaña politico ,particularmente di partido AVP den e caso aki (700 florin pa extra pa pensionado, cambia contenido di Rijkswet y comberti debe di Covid den un fondo di inversion etc) no ta cumpli, e ora por bisa cu ‘no a cumpli’. No prome!

CON TA CONTA E DIANAN ANTO

Contrario na storia y creencia eroneo di hopi hende, cu e 100 dia di e gobierno nobo a cuminsa desde 6 di December ultimo despues di e eleccion mes, esaki sinembargo no ta corecto. Pa cuminsa, e gobierno no a ni forma ainda, corda pa cuminsa conta e dianan. E conteo ta cuminsa ‘apenas’ despues cu a huramenta e candidatonan. Tur loke a sosode, y e tempo cu a tuma pa forma e gobierno, no ta forma parti di e conteo, pa mas cu oponentenan kier pretende y of kere of sigura, esaki no ta e caso. Loke si ta corecto ta cu entre e fecha di eleccion pa diabierna awor, lo a pasa 112 dia. 

PROMESANAN NO CUMPLI

Por a nota di varios skina, politico y no, tabata tilda e gabinete nobo entrante di incumplimento di promesa, manera esun di partido AVP. Mientrastanto, eleccion a tuma lugar y awe diaranson, nos ta 110 dia mas leu. Pues de hecho, a tuma 109 dia desde eleccion, pa informa gobernador cu gobierno ta cla (ayera diamars), y a tuma 89 (2 luna y 3 siman) dia pa forma un gabinete, desde cu gobernador a nombra e formadornan e encargo, dia 27 di December 2024 . Mester compronde si tambe cu a dura 3 siman pa screening di e formadornan, pues kita esey, ta keda 68 dia total cu formadornan a tuma pa forma gobierno. Loke a tarda e proceso, ta e tardansa pa formula e lista di candidato pa partido AVP, sino e gabinete lo tabata cla mucho mas lihe. Si despues di diabierna, e gabinete pasa 100 dia, cu ta hiba nos na diadomingo 6 di juli 2025, e ora por papia di ‘incumplimento’ di promesa. No prome.