Bishita di Szabó otro luna na Aruba ta prome test pa gabinete AVP-FUTURO

ORANJESTAD/ DEN HAAG – Aki dos siman, oficialmente Gobierno Hulandes (lesa: Secretario di Estado Zsolt Szabó) ta cera conoci cu gobierno nobo di Aruba (lesa: Gabinete AVP-FUTURO). Oficialmente como gobierno, pasobra riba 12 di augustus 2024 actual formador y prome minister proximo di e gabinete nobo a topa e mandatario hulandes caba durante su bishita na Aruba e tempo ey. E biaha ey, den calidad di lider di fraccion di partido AVP como partido di oposicion, e la intercambia di buki cu e mandatario Hulandes. Pero e biaha aki ta bin e bishita ‘oficial’, programa pa dia 8 di April proximo. Szabó lo ta bishitando Corsou tambe. 

PROME PRUEBA

Durante e prome bishita oficial aki, ta bira mesora e prome ‘prueba’ di kico por spera nos pa loke ta e relacion ‘nobo’ entre Aruba y Hulanda. Esaki mirando e pensamento di e gabinete nobo relaciona cu e.o. e rijkswet riba supervision financiero y otro asuntonan. Un di e partnernan, AVP, a sigura cu nan kier cambia henter e ley aki, y ademas cambia e debe di Covid19 den un fondo di inversion. Partido FUTURO, tin otro idea y a sigura cu e ley ta bon manera cu e ta. Ta bira interesante e ora pa wak con esaki lo desaroya durante e bishita ey. Szabó a bisa caba, cu e no ta bay cambia e fecha di 1 di mei riba cual mester entrega e concepto di ley na tanto Parlamento di Aruba como Tweede Kamer, y Eman a bisa cu e no ta kere cu lo ta un problema pa cumpli cu e deadline ey. Di otro banda, si kier cambia e contenido, no ta duna suficiente tempo pa logra esaki. Noticiacla a compronde tambe cu Hulanda no ta interesa pa e idea di cambia e debe den un fondo, y kier simplemente pa Aruba mantene su mes na palabracionan haci. Esta paga e debe bek, sea cual sea e condicion. 

STRUCTURA DI CARTERA

Loke ta haci e bishita interesante tambe ta cu e ta bira e prome prueba di e constelacion di minister, unda cu pa prome biaha a crea un ministerio nobo, esta Ministerio di Relacionan di Reino (Koninkrijksrelatie) cu a bay pa e partido FUTURO, siendo cu semper ta prome minister di e pais ta atende cu asuntonan di Hulanda. Con esaki lo ‘speel uit’ lo ta interesante tambe. Ademas, ta bin e hecho cu e cartera di minister plenipotenciario, cu normalmente ta cay bou di prome minister di e gabinete, e biaha aki ta cay bou di e minister di Asuntonan di Reino. Y pa completa e obra, e minister plenipotenciario ta di AVP, y tin cu raporta na e minister di FUTURO. 

KICO TA PASA?

Ta durante e bishita aki di Szabó, por haya sa kico e pensamento ta di Hulanda, concretamente y kico nan ta pensa di e asunto aki. Conociendo Hulanda, nan lo djis kier mira pa Aruba cumpli cu e palabracionan haci, siendo cu ta via un ministerio nobo crea, sea cu e ta bay via partido AVP of FUTURO, basta cu e cumplimento tey. E asunto ta mas bien na Aruba unda cu esaki mester ta bon cuadra y aliña pa no haya friccion innecesario cu por destabilisa e gobierno ya na su comienso.