E dos formadornan mes ta pendiente resultado di nan screening

ORANJESTAD – E proceso di screening no ta pega solamente na un persona of candidato, manera algun medio local ta raportando. Noticiacla a compronde cu e proceso completo no ta cla, incluyendo e parti di e dos formadornan mes. Mas specifico, nan propio resultado di screening no a keda trata ainda, pues ey tambe tin tardansa te cu diabierna atardi. Manera ta conoci, segun e ley di screening nobo, ta e president di Raad van Advies ta ricibi resultado di screening di e formadornan y mester formula un conseho pa Gobernador. Parti di esaki ta ensera cu un combersacion mester tuma luga entre e president di RvA y e formadornan, cual no a tuma luga ainda. 

Fuera di esey, un di e candidatonan pa minister, Mike de Meza a confirma mas prome na e portal 24ora cu e ta un candidato, pero no a confirma cu ta pa motibo di asunto di impuesto, su parti di screening ta pega. E ta confirma si cu tin algo eynan, pero cu ta oposicion ta purbando di tapa algo di nan mes. Esey no ta logico, pasobra oposicion no tin resultado di screening ainda, como cu ta formadornan tin cu manda un rapportage pa parlamento. Ademas, si no tabatin problema cu impuesto, sr. De Meza lo no mester a menciona DIMP mes bisando cu e ta su derecho pa tin obhecion contra e resultado. “Cu tin obhecion, tin obhecion y si mester yega na un areglo pa algo, husto of no, por haci un areglo mescos cu tur hende ta haci. No tin nada straño” ta Loke el a declara na e portada. Loke si, De Meza no ta tene cuenta cu ne den e declaracion aki, ta cu e screening ta wak un persona su comportacion di ultimo 5 aña. Un areglo pa pago no ta cambia e comportacion di ultimo 5 aña. 

Bek pa e formadornan, ta pendiente pa trata nan propio resultado di screening, y esey kier men cu ta drenta un otro fin di siman cu no tin conclusion riba e tema, mientras cu ta 3 luna y mei, cu Aruba a conoce su eleccion y cu no tin un gobierno cla y huramenta.