Aeropuerto mes, sin ayudo di RSG, ta buscando un CEO nobo

ORANJESTAD – Aeropuerto di Aruba a cuminsa oficialmente cu su buskeda pa un CEO nobo, despues cu for di aña pasa juli, e ta oficialmente sin CEO na cabez despues cu e ultimo CEO, Joost Meijs a opta pa bandona Aruba prome cu su tempo. For di e tempo ey, tres arubiano, Jurgen Benschop, Barbara Brown y Aisha Anthony ta na cabez como un management team. Pero segun minister demisionario di turismo, responsabel pa aeropuerto Dangui Oduber a confirma pa noticiacla cu e buskeda a cuminsa, mirando cu mester haci algo. Loke ta hala atencion ta cu ta Aruba mes a cuminsa cu e buskeda, y no Royal Schiphol Group, cu ta esun cu segun contract, mester a presenta un CEO nobo. No ta conoci pakico no a busca un CEO mesora despues cu Meijs a bandona Aruba. 

CONTRACT

For di 2004, Aruba tin contracto cu Royal Schiphol Group unda cu e aeropuerto tabatin un CEO na cabez, apunta pa RSG. E prome tabata Peter Steinmetz, cu a keda pa un periodo di 10 aña. Despues a presenta e mericano James Fazio cu a keda menos, entre 4 y 5 aña y finalmente sr Joost Meijs cu tambe a keda net algo menos cu 5 aña. 

GASTO Y CONDICION 

Pa loke ta e gasto cu mester a paga RSG pa aña, esaki no tabata poco, y a cuminsa cu e suma di 4.5 miyon pa aña. Pero e contracto a keda prolonga varios biaha, cu cambio di suma tambe, y pa aworaki e ultimo suma ta entre 6 pa 7 miyon florin pa aña, pues un aumento basta considerable. Algo cu gobierno di Aruba ta considera mucho hopi. Ademas e condicionan di contracto tambe tabata cambia, pero e punto mas principal mes, esta cu RSG mester prepara un yiu di tera pa bira CEO, nunca no a tuma lugar. Ademas un otro condicion ta cu kier aumenta e suma aun mas, y tambe kier tin un asiento den hunta di directiva y accion den e compania. Tur ta puntonan cu gobierno actual tin basta problema cune. Esey a conduci na un impasse entre gobierno y RSG, cu aa pone cu for di December unda cu mester a negosha y firma un contracto nobo, no a tuma lugar pa cual RSG a informa gobierno cu como no a cumpli cu e fecha pa contract nobo, cu nan ta ‘bula afo’, despues di 6 luna, cu ta vence na juni proximo (2025). Esey kier men cu tin chens cu RSG por bandona Aruba e ora. Gobierno a mustra cu nan no kier pa RSG bandona Aruba, pero si cu e contracto mester ta mas husto. Pero, activamente no a haci esfuerso mas pa regla e impasse cu tin aworaki. Esey ta nifica cu e ta keda un punto principal pa e proximo gobierno pa regla, sino RSG enberdad ta bandona Aruba. 

RSG VS CEO LOCAL SIN RSG

Mientras cu por compronde e disgusto cu gobierno tin cu RSG, y cu pa tur e tempo aki, e tres localnan a sa di maneha aeropuerto den un forma basta bon, e realidad ta si cu e aeropuerto cu RSG na cabez, ta duna un marca di seguridad pa financiadornan cu actualmente a financia e aeropuerto y tambe pa e ratings cu ta importante. Ta e mesun pensamento ora cu instancianan manera FITCH y otro agencianan di rating ta sigui sostene Aruba, primordialmente pasobra e tin sosten di Hulanda como un ‘backup’. Si no ta pa e backup Hulandes, e agencianan di rating lo a mira e situacion cu un otro wowo sigur. Y mescos ta conta awor pa e situacion di aeropuerto. Esey no ta kita afor cu e tres directornan local, a sa di tene e aeropuerto ‘operacional’, aunke cu a pasa den algun scenario basta fastioso, pero cu di cual nan a sali afo hopi bon, sin un CEO di RSG. Realidad ta, cu aeropuerto mester un CEO dedica, y no manera cu e situacion ta aworaki, esta tres persona cu tin nan propio responsabilidad y riba dje mester maneha e aeropuerto y haci trabou di un CEO, mientras cu nan no ta ricibi e pago pa esey.