Gobierno a gana caso contra Amsterdam Manor Resort y AWSS pa asunto di RWZI

ORANJESTAD – Gobierno pa medio di su abogado mr David Kock a gana su caso contra tanto Amsterdam Manor como e compania nobo cu ta encarga cu trabou na e Riool Water Zuiver Instalatie (RWZI) na Bubali, esta Aruba Wastewater Sustainable Solutions NV (AWSS) cu ta nifica cu e no mester paga multa pa incumplimento di trabounan necesario pa limita e mal holor di awa sushi na e hotel y area. Pa loke ta e multa, esaki ta di riba 1.5 miyon florin incuri, segun e hotel en cuestion.  .  . Pero durante e caso, a bira cla cu gobierno no por wordo teni responsabel pa tur e loke cu e hotel ta alega, y cu como tal a sea cumpli of ta cumpliendo cu e peticion conforme un ssentencia di dia 8 di mei 2024, unda cu gobierno a haya un set di medida pa implementa, pa remedia e situacion di mal holo a consecuencia di e fayo na RWZI. Huez a bay di acuerdo cu e ponencia di gobierno, y a dicta cu mesora, e multanan no por wordo cobra. Ademas, en caso gobierno viola e acuerdo nobo, cu e multa cu e hotel por eventualmente cobra, ta un maximo di 330.000 florin envez di e 5 miyon impone, y por wordo cobra un biaha so. 

CASO LARGO

Ta trata di un caso largo cu e hotel a inicia mirando cu segun e hotel, pa hopi aña mes, gobiernonan di turno a neglisha e situacion y cualkier otro areglo y intervencion, cu a conduci na un situacion deplorable cu no tabata tolerable mas. Aña pasa, a consecuencia di esaki, den un sentencia na mei di 2024, huez e tempo ey a sentencia gobierno na un sin fin di medida, y cu incumplimento, lo tabatin multa. Y ademas, pa complica e cos mas ainda, a involucre e compania nobo  (AWSS) cu apenas a cuminsa opera aña pasa, y cu a bira conoci despues cu no por a tene un of e otro responsabel, esta gobierno y of e compania, pasobra e responsabilidadnan a cambia. Sinembargo, e hotel a opta pa trata nan mescos, causando cu ambos a dicidi di hiba e hotel corte pa asina haya un miho claridad riba ken tin cua responsabilidad, basa riba nan tempo di existencia, y trabou haci. Ademas, a urgi huez pa kita e multanan cuantioso, mirando cu no tabata un situacion husto pa ningun di nan, esta gobierno y AWSS.