Corte a limita cantidad di testigo cu defensa kier a scucha ainda den caso Tulipan

ORANJESTAD – Huez diaranson mainta a limita e cantidad di testigo cu defensa den caso penal Tulipan a pidi pa scucha ainda of atrobe. E la permiti ‘apenas’ 4 di e 10 nombernan someti diaranson mainta. E caso ta envolvi e.o. ex minister plenipotenciario Guilfred Besaril y ex director suplente di Arubahuis sr Ling cu ta wordo acusa di e.o. estafa, y malversacion di fondo publico. E caso diaranson tabata mas bien un ‘regiezitting’ pa determina e progreso di e investigacion y caso.   

ARGUMENTO PA SCUCHA TESTIGO 

E argumento principal di abogado pa ‘bolbe’ scucha algun testigo y scucha otronan pa prome biaha, ta pasobra varios di e testimonionan inicial no a cubri areanan specifico unda cu e abogado kier claridad. Y ta e claridad aki por nifica un posibel absolucion pa su cliente. Varios pregunta cu ta importante segun e abogado, no a wordo haci, y kier un chens pa haci esaki. Notable ta cu entre esnan cu a keda afo, ta director di DHR y Departamento di Finanzas, mientras cu algun cu ya caba a wordo scucha, huez a limita solamente pa scucha nan riba tema specifico, y nada ‘en general’. 

CONTENIDO TECHNICO PRESUPUESTARIO

A resulta cu gran parti di e defensa y testimonio lo ta basa riba e aspecto technico presupuestario di pais Aruba, e maneho cu tabata wordo usa, y cu si a mantene e maneho aki si of no. Uso di credit card di gobierno corectamente, kico tabata por a haci como minister plenipotenciario y kico no. Y hopi di e acusacionan segun e defensa, no ta corecto y e informacion adkeri ta robez. 

FECHA DI CASO Y PROGRESOInicialmente, huez a informa cu a reserva e fechanan 16, 20 y 23 di mei proximo pa trata e caso integralmente. Pero despues a resulta cu un di e abogadonan tabatin problema cu un di e fechanan, esun di dia 16. Mirando cu huez a admiti pa scucha testigo awor, e caso ta keda suspendi pa tempo indefini, aunke e fecha pa trata e caso awor ta bira posiblemente 20 y 23 y un otro fecha mas pasobra e huez a informa cu e kier reserva 3 dia pa tratamento di e caso aki. MIentras cu e prome dia no ta sigura ainda, a informa cu debidamente lo manda yama e partidonan envolvi ora cu e fecha exacto ta conoci.