Buskeda pa personanan Venezolano perdi riba laman ta continua

ORANJESTAD/ WILLEMSTAD – E buskeda pa personanan perdi riba laman ta continua, segun Wardacosta a raporta. Manera ta conoci, e  Centro di Operacion Marítimo (MOC) di Wardakosta a risibí un notifikashon diamars mainta ku un òf mas boto lo ta pèrdí riba laman. E boto of botonan lo a sali for di Venezuela rumbo pa Kòrsou ku varios persona indokumenta na bordo.

Despues di a risibí e notifikashon, MOC mesora a desplegá e helikòpter i e avion di Wardakosta pa buska den area di kosta i tambe awanan rondó di Kòrsou pa logra haña e botonan pèrdí. Durante e búskeda, un kontakto a wòrdu detektá riba radar i MOC a dirigí e avion Dash den direkshon di e kontakto aki. Ora ku e avion a yega na e sitio, a resulta di ta un boto ku a boltu ku varios persona ta wanta na e boto ku a boltu. Siguiendo e informe di e avion Dash, MOC a dirigí e helikòpter di Wardakosta i dos Metal Sharks pa reskatá e hendenan riba laman. Un total di 10 persona a ser reskatá awe merdia, entre nan 4 hende muhé i 6 hende hòmber, tur prosedente di Venezuela. E personanan a indiká ku tin varios persona pèrdí ainda riba laman. E búskeda pa e personanan pèrdí ta andando. NOTA: Texto ta scirbi den Papiamento fonetico di Corsou.